Partîya Çep a Keske bi tewrbîyayîşê bi hezaran kesan  Qoserê Mêrdînî de mîtîngê xo kerd. Hemsereka DBPyî Salîha Aydenîz û sîyasetmedar Ahmet Turk tewrê mîtîngî bîyî. Warê mîtîngî ra sloganê sey  “Bê Serok jiyan nabe” û “Bijî Serok Apo” bîyî berz. 

Verî namzedê Mêrdînî dîyayî nasdayene û badê qiseykerdişê akerdişî Ahmet Turkî qisey kerd. Turkî vîst vîrî ke şarê kurdî zaf bedelê girdî dayî û vat: “Şarê kurdî çirey  milê xo çewt nêkerd. Ma do sey blokê demokrasîyî do nê sîstemî bibedilnê. Şarê ma do nê zilmî ra bêro xelisnayene. Walî û qeymeqamî  şarî tehdît kenê wa rayanê xo medê Partîya Çep a Keske.  14ê gulane de înan ra do hesab bêro persayene. Partîya ma eşkera kerd ke do paştî bido Kiliçdarogluyî. La wa nê bizanî, eke siba ê şarê ma rê xeletî bikerê ma do hesabê ey zî bipersê. No têkoşînê azadîye yo, no têkoşînê şarê ma yo. Guneyo, herem o raya xo medê AKP û partîyan bînan.” 

Salîha Aydenîz zî bale antê coşê şarî ser û vat: “Wa no coşê şima nêqedîyo.  Wa coşê şima ra bitersê. Ma vînenê ke waran qerarê xo dayo. 14ê gulane de do dara ma şiro dîyar û ambûlê AKPyî hewna bikero. Semedê azadîya şarê kurdî, semedê azadîya xoverdayoxanê zîndanan, semedê şawitişê qeyûman rayê ma zaf muhîm ê. Gerek ma 14ê gulane de sindoqan cameverdê. Pawitişê sindoqan berpirsîyarîya ma ya. Vera kurdan polîtîkayê leyminî yenê rayraberdene. Vera nê zextan, hêrişan têkoşînê şarî kurdî dewam keno. Ewro şarê kurdî bi slogana Jin, Jiyan azadî dinya rê bîyo nimûne. Şima hemrayê Ferhat Kurtay ê, senî ke ey milê xo çewt nêkerd, hemrayê ey zî  do milê xo çewt nêkerê û no  îqtîdar do şiro.  Ma do 14ê gulane de beranê Îmraiyî bikerê lete leware. Ma do dişmenanê kurdkî bişawê. Ma do azadîye înşa bikerê.”

Badê qiseykerdişan mîtîng pê deyîranê hunermendan dewam kerd.