Partîya Çep a Keske Riha de Mîtîng kerd. Hemsereka Pêroyî ya DBPyî Salîha Aydenîz, Hemserekê Pêroyî yê HDPyî Mîthat Sancar û xeylêk îdarekarê partîyanê syasîyan ê kurdan tewrê mîtîngî bîyî.

Salîha Aydenîz mîtîng de wina qisey kerd: “Weçînitişê 14ê gulane mabênê edalet û bêadeletîye de beno. No weçînitiş mabênê koletîye û azadîye de beno. mabênê faşîzîm û demokrasîyî de yo. Gerek ma nê hol bizanê. Semedê edalet û haştîya birumete û demokrasîyî ma têkoşînê xo xurtêr kenê. Şarê Riha zî do semedê edaletî şiro sindoq ser. Gerek ma morê xo bidê binê dare ro. Seba ke weçînitişî sey darbe vînenê bi provokasyonan mesajê darbe danê. Îtîfaqê înan îtîfaqê torosê sipî yo. Îtîfaqê înan îtîfaqê dîşmenîya vera kurdan o. Îtîfaqê ma yê demokrasî, azadîye yo. Nê semedî ra ma do semedê azadîye û seyyewbînîye peynîya darbekeran bîyarê. Înan derbeya tewr girde Îmrali de kerd. Waşt heme şarî bigêrê binê tecrîdî. No îqtîdar wazeno bi tecrîdî payra bimano. Ma vanê ke heta ke berê Îmraliyî anêbê do demokrasî mero nê welatî. Siba eke muxalefet bêro îqtîdar û tecrîd dewam bikero o zî beno hemkarê bêhuqûqîye. Ma tîya ra reyna vanê êyê ke semedê Rayberê Şarê Kurdî vengê xo nêvejenê wa merê Kurdîstan. Semedê meseleya kurdan muxatap Birêz Abdullah Ocalan o. Coka ma semedê azadîye û haştîye rayanê xo şuxulnenê.” 

Mîthat Sancar zî nê vatî: “Xoverdayîş xora karê ma yo. Ma pê xoverdayîşî heta nê rojan ameyî. Ma vera zaliman çok nêda, xover da. Ma do 14ê gulane de nê xoverdayîşî bi înşayêkê neweyî biresnê pê. Îqtîdar bi provokasyonan û tehdîtan kampanyaya weçînitişî rayra beno. Hêrişê Erziromî hêrişêko programkerde yê nê îqtîdarî yo. Îtîfaqê AKP-MHPyî zano ke vînî keno. Coka kenê ke şarî bitersnê mîtîng û sindoqan ra bifînî dûrî. La no şar nê kayanê nêxapîyeno. Ma do qerardar rayîrê demokrasîyî de rayra şirê û heme kayan û provokasyonanê înan pûç vejê. Ma do beranê azadîye abikerê.”