Mizrakli: Adresê umîdî Îmrali yo

Parlamenterê HDPyî Selçûk Mizrakliyî vat ke sebebê kaos û krîzan ê welatî tecrîdê serê Rayberê Şarê Kurdî Abdullah Ocalan o û vat adresê umîdî Îmrali yo.

Rayberê Şarê Kurdî Abdullah Ocalan 27ê Temuze 2011 ra nata avûkatanê xo dir, 5ê Nîsane 2015 ra nata heyetê Îmraliyî dir û 11ê Êlule 2016 ra nata zî keyeyê xo dir nêeşkeno pêvînayîş virazo. Grevê vêşanîye yê hemsereka KCDyî û parlamentera HDPyî ya Colemêrgî Leyla Guvene ke seba wedartişê tecrîdê serê Ocalanî dabi destpêkerdene kewt roja xo ya 66ine. Parlamenterê HDPyî yê Amedî Selçûk Mizrakliyî derheqê tecrîdê serê Ocalanî û çalakîya Leyla Guvene de ANFyî rê qisey kerd.

 

 ‘TECRÎD HEMVERÊ ŞARAN DE YENO BICAARDENE’

Mizrakliyî nê vatî: “Hemverê fedakarîya birêz Ocalanî de dewlete Parîs de 9ê Çile 2013 de 3 cinîyê şorişgêrî Sakîne Cansize, Leyla Şaylemeze û Fîdan Dogane qetil kerdî. Eksê na komploye de birêz Ocalanî fek prosesê çareserî ra vera nêda. Tecrîd tena serê Ocalanî de nê, serê heme şaranê bindestan de yo.

Zîndanan ra qîrayîşêk berz beno. Tîya rolêko pîl keweno milê sîyasetkaranê Tirkîya, sazîyanê sivîlan, çapemenî, sazîyanê unîversalan, CPT û meclîsê Ewropa. Ganî ma nê qîrayîşî rê veng bidê, na berpirsîyarîya her kesî ya. Çunke tecrîd cuye keno tarî û ganî ma rayîrê azadî û demokrasî akerê.”

 ‘CPT NÊ SÛCÎ RÊ HEMPAR O’

Mizrakliyî hemverê bêvengîya CPTyî de zî reaksîyon ramot û vat: “Berpirsîyarê tecrîdê serê birêz Ocalanî û çalakîyanê ke Tirkîya û Kurdistan de vila bîyê qethî CPT yo. Ganî CPT berpirsîyarîyanê xo bica biyaro. Eke CPT polîtîkaya xo ya nikayêne bidomno do wesfê xo yê sazîyêka xoser û bêhete bîyayîşî vîndî bikero.

Ganî CPT tavilî şiro Îmralî û seba wedartişê tecrîdî xebate bikero. Heta tecrîd nêwedarîyo do aşitî, huzûr, azadî û demokrasî nêro welat. Gamêkê Rojakewtena mîyanêne de erzîyenê gamê bixeyrî nêyê. Sebebê nînan ra zî yew tecrîd o.” 

AKP KEŞTÎYA XEYALÎ DE YO

Mizraklîyî peynîya qiseykerdişê xo de nê vatî: “No sîstem nêwazeno waştişanê şarî bivîno. Amacê sîstemî tena vînayîşê hetgêranê xo yo û qedînayîşê grûbanê muxalifan o. Rejimê AKPyî raştîya heqîqetî ra dûrî kewta û verê xo dayo perdeyê xeyalî. AKPyî paştîya xo açarnaya heqîqetî. Leyla Guvene sey parlamenterêk bi grevê vêşanîye bêvengîya meclîsî sey keştîya xeyalî name kena. Eke no sîstem nêwazeno problemî bivîno ganî ma zî tim nê problemî biyarê verê çimanê înan. Naye ra destê kamî ra çi yeno ganî bikero û goş bido qîrîya Leyla Guvene.”