Bajarê Montpellîerî  yê Fransa û Bajarê Stuttgartî yê Almanya de aktîvîteyê vîrardişê şehîdan ameyî viraştene.

Aktîvîteya  Montpellierî de temsîlkarê FEDAyî Şenol Hantekînî şehîdî yad kerdî û va: ''O zîhnîyeto ke qetlîamê Maraşî kerdo, qetlîamê Roboskî zî eyî hetî ra ameyo kerdene. Ma do verê nê zîhnîyetî de pîya vinderî. Erdogan dişmenê Kurdan, Elewîyan û Îslamî yo.'' Hantekînî dima qiseyî ard hêrişo ke hefteyo verîn de erzîya Mexmûr û Şîngalî ser, hêrişî şermezar kerdî.

Dima zî sînevîzyono ke semedê qetlîamanê Maraş û Roboskîyî amebi hadrekerdene, ame ramotene.

STUTTGART

Bajarê Stuttgartî yê Almanya de zî semedê paştdayîşê keyeyê şehîdan werd dîya. Werdo ke hetê Merkezê Cimata Demokratîkî yê Kurdan ra dîya, xeylêk Kurdistanijî tewrê ci bîyî.

Bi nameyê keyeyê şehîdan Berîvan Oke qisey kerd. Oke bale ante muhîmîya şehîdanî ser û va: '' Bajaranê Ewropa de ruhê Kurdîstanî cuyayene, şehîdanê xo vîrardene û yadkerdene semedê ma deynêko tarîxî yo.''

Sîyasetmedaro Kurd Ahmet Aktaşî zî meyman bi û muhîmîyetê paştdayîşî bi keyeyê şehîdan ser vindert  û va: ''Tarîxê Kurdistanî tarîxê şehîdan o zî. Raştîya ma şehîdê ma yê û ê ke înan ma rê verdayî.''

Çalakîya vîrardişî deyîranê Xemgîn Bîrhatî ra dima qedîyaye.