Aytene Morsumbula ke bi serran seba eşkerakerdişê aqîbetê vistewreyê xo Huseyîn Morsumbolo ke 18ê êlula 1980î de wextê destbendkerdişî de amebi vînîkerdene, têkoşîn kena. A nika zî seba lajê xo Eser Morsumbulo ke tepişteyo nêweş o têkoşîn kena. Aytene da zanayene ke Eser hema qijîya xo de pê kanserî kewto, tede helîyayîşê esteyan zî est o.

Aytene pare kerd ke Huseyîn Morsumbul wextê Derbeya 12ê Êlule de Çewlîg de amebi destbendkerdene û dima tira xeberêke nêameya girewtene. Aytene vat: ''Mi Huseyîn qetî nêdî. Ez tena qiseyanê cinîya ci û dadîya ci Fatma ra ey şinasnena. Dima ke bira Huseyîn ameyo destbendkerdene babîyê ci zî tepişîyeno û 6 rojan îşkence vîneno. Reya verêne mi dayîke Fatma berde Meydanê Galatasarayî, çalakîya Mayanê Şemeyî. Aye vatêne 'Eke ez esteyanê Huseyînî nêvîna, mi pê qezaxê ey defin bikerê.' Wefatê aye de 2015 de mi zî wina kerd. Ewro torê mi est ê û ê zî gêrenê esteyanê apê xo yê pîlî Huseyînî.''

Aytene dîyar kerd ke keyeyê înan tim hedefê dewlete de yo û lajê ci semedê peynameyê xo ra Meydanê Teyarayan ê Îstanbulî de karî ra ameyo vatene. Aytene vat: ''Eser hema ke 12 serre bi tede tumorê mezgî vejîya. Tedawîya radyasyonî û kemoterapî ra zî tede nêweşîya gurçikan zî est a. 2017 de neqlê gurçike ra 6 mengan dima Eser bi îdîaya endamîya DHKP/Cyî tepişîya. Eser 6 serrî yo zîndan de yo. Seba ke tedawîya ci yena astengkerdene vera beno xirabêr. Mi zaf reyî muracatê Wezîrîya Edaletî kerd. Tewr peyên zîndan de doktorî tira vato ke ey de helîyayîşê esteyan zî est o û beno ke esteyê ci sey camî bişikîyê. Coka lajê mi her roje derzîne weno. 

Tewr peyên 10 rojî verî mi lajê xo zîyaret kerd. Cezaya lajê mi 2024 de qedîyena la wa nika ra o vera bidîyo. Hînî bes o. Ez nê zulmî qebul nêkena. Wa her kes na babete de hîsger bibo.''