Îbrahîm (Zulfu) Yildirimî 14ê tebaxe de Zîndanê Xarpêtî de amebi qetilkerdene ke tehlîyeyê ey rê 10 rojî mendbî. Wekîla HDPyî ya Amedî Dêrsime Dag derheqê mergê Yildirimî de vernîyazêkê persan pêşkêşê Wezîrîya Edaletî kerd. 

Dêrsime Dag Meclîs de derheqê babete de qisey kerd û pare kerd ke zîndan de tepişteyan rê merg yeno ferzkerdene û her ke şino zîndanan ra hîna zaf cenazayî vejîyenê. Dage vist vîrî ke tepişte Zulfu Yildirimo 68 serre astengdar bi û kanser est bi.  Dage bale ante ser ke rixmo ke Yildirim astengdar û kanser bi Zanîngehê Firatî yê Xarpêtî raporê 'eşkeno zîndan de bimano' dabi ci. Dêrsime Dag vat: ''Îdareyê zîndanî îdîa kerd ke Yildirimî krîzê qelbî ra dinyaya xo bedilnaya. Ma rê dîya zanayene ke Yildirimî rê mudaxele nêameyo kerdene û ambulans erey ameyo. Hetê bînî ra mergê ey ra 4 saetan dima xebere dîyaya keyeyê ci.''

Wekîle Dêrsime Dag vernîyaz de nê persî pers kerdî: 

''- Wezîrîye derheqê mergê Yildirimî de tehqîqatêk kerd yan zî do bikera?

 -Derheqê îdareyê zîndanî û nêweşxane û doktoranê ke raporê 'eşkeno zîndan de bimano' de tehqîqatêk do bêro akerdene?

-Yildirim rixmê nêweşîyanê xo zî çira vera nêdîya û hucreyê yewkesî de tepişîyayêne?

-Yildirimî çira dinyaya xo bedilnaye? 

-Wezîrîya do îdîaya 'mudaxele nêameyo kerdene û ambulans erey ameyo' ser o cigêrayîş bikera? 

-Yildirimî key dinyaya xo bedilnaya? Key xebera mergê ey dîyaya keyeyê ci? 

-Şima seba ke verê mergê zîndanan bigêrê polîtîkayêke bikerê? 

-Şima do nêweşanê giranan vera bidê? 

-Zîndanan de hûmara tepişteyanê nêweşanê giranan çendek a?''