Avûkatanê Rayberê Şarê Kurdî Abdullah Ocalanî Mazlûm Dînç, Razîye Ozturk, Îbrahîm Bilmez û Newroze Uysale dimayê îdîayanê medyaya sosyale semedê pêvînayîşê lezabezî muracatê Serdozgerîya Komare ya Bursa û Wezîrîya Edaletî kerd.

Waştişnameyê muracatî de ame vîrvîstene  ke tewr peynî 3ê adare ya 2020î de pêvînayîş ame kerdene û dima ra 27ê nîsane ya 2020î de bi rayîrê telefenonî xebere ameye girewtene û ame vatene ke a roje ra nata rixmê heme muracatan pêvînayîşêk nêame kerdene.

Avûkatan bale ante ser ke rixmê janê ke tehdîtê ci yê mergî esto qet yew tekîlî nêameye ronayene û ard ziwan ke xora şertê Îmraliyî û tecrîdo giran pîya bi hepsê dergî qedexeyê îşkenceyî binpay kenê.

Avûkatan ard vîrî ke rixmê raporê CPTyî çîyêk nêame bedilnayene û vat: ''Tarîxê 14.03.2021 de medyaya sosyale derheqê weşîya birêz Ocalanî de  îdîdayî ameyî parekerdene ke ma û keyeyê ci qerqilîyenê. Coka ganî cade ma ey ra xeberêke bigêrê. Semedê nayî zî ma wazenê wa lezabez pêvînayîşêk bêro kerdene.''