Tepişteyanê Îmraliyî Rayberê Şarê Kurdî Abdullah Ocalanî, Hamîlî Yildirim, Omer Hayrî Konar û Veysî Aktaşî ra 38 mengî yo xeberêke nêna girewtene. Muracatê pêvînayîşî yê keye û avûkatan bi bahaneya 'cezayanê dîsîplînî' yenê astengkerdene.

Veysî Aktaşî 28ê nîsane de înfazê cezaya xo kerdbî temam. La rixmê ney zî Heyetê Îdareyî û Çimdarîye tehlîyeya Aktaşî serrêke taloq kerdbî. Avûkatanê Buroyê Huqûqî yê Asrinî vera ney muracatê Hakîmîya Înfazî ya Bursa kerdbî. La Hakîmîye 2yê gulane de muracat red kerd.

Goreyê xebera Ajansê Mezopotamya tewr peyên avûkatan muracatê Mehkemeya Cezaya Girane ya Bursa kerd. La na mehkeme zî muracat red kerd. Bire 10ê gulane de qetî bîye.

Dîya zanayene ke avûkatî do muracatê Mehkemeya Qanûnê Bingeyîyî (AYM) bikerê.