Muxabîrê MA Mehmet Aslan 5ê çeleyî de semedê karanê xo yê rojnamegerîye ra tepişîya û erşawîya Zîndanê Antalya.

Mehmet Aslanî pê rayîrê telefonî kekê xo Mehmet Şîrîn Aslanî rê vat ke o dekewtişê zîndanî de maruzê cigêrayîşê rûtî mendo.

Kek Aslanî bale ante ser ke cigêrayîşo rût pêro zîndanan de yeno kerdene û da zanayene ke Mehmet Aslan cigêrayîşê rûtî rê îtîraz ker.

Kek Mehmet Şîrîn Aslanî vat: ''Îdare îtîrazê ci peygoş kerdo. Birayê mi vat o do kamca de bo wa bibo do vera neheqîye qelema xo bixebitno û rojnamegerîye dewam bikero.''

Mehmet Şîrîn Aslanî da zanayene ke semedo ke birayê ci û tepişteyî bînî paştî danê grevê vêşanîye werdê înan kêm dîyeno. Aslanî vat: ''Tepişteyê bi nameyê Hasan Yakut, Ferhat Konuk, Hasan Katarî paştî danê grevê vêşanîye. Mektubî nêdîyenê tepişteyan. Wexto ke mi vat ez do ey rê kitaban bierşawa birayê mi vat kitabî bi hawayêkê keyfî nêdîyenê.''

Wekîlê HDPyî yê Kocaelî Omer Faruk Gergerlîogluyî zî mesele berde Heyetê Pêroyî yê Meclîsî.