Hewteyo verên muxtarê mehlayanê ke tede se ra 70yî ra vêşêr reyî HDPyî rê vejîyabî gure ra gîrîyayî. 

Wezaretê Karê Zereyî rojanê vîyarteyan de, qezaya Artemêtan a Wanî de muxtarê mehlaya Şabanîye Çetîn Bîlîr, muxtarê mehlaya Suphanî Ayhan Komî û muxtarê mehlaya Esentepe Ahmet Nantoyî gure ra girewtî. Herinda nê muxtaran de do kesê bînî hetê Xespkerdoxê Artemêtanî Atif Çîçeklîyî ra bêrê tayînkerdene.

DIMAYO KE XESPKERDOXÎ RAPOR DA SOYLUYÎ 3 MUXTARÎ GURE RA GÎRÎYAYÎ

24ê Hezîrane ra dima xespkerdox Çîçeklîyî personelan ra vat „Ma hende xizmet kerd ancî zî înan reyê xo dayî HDPyî, nê merdimî nankor ê.“ Bi raporê Çîçeklîyî ke şirawitibi Suleyman Soyluyî rê peynî ro wezîfeyê  3 muxtaran dîya. 

WEÇÎNITIŞANÊ CAYÎYAN Ê 2014Î DE BI NISBETÊKÊ BERZÎ BIBÎ MUXTAR

Her 3 muxtarê ke gure ra gîrîyayî weçînitişanê cayîyan ê 2014î de mehlayanê xo de bi nisbetêkê berzî reyî girewtîbî. 

Nê mehlayan de berzbîyayîşê reyanê HDPyî bale ancena, weçînitişê cayîyî 24ê Hezîrane de mehlaya Suphanî de HDPyî 6 hezar û 97 reyî, AKPyî 1650 reyî, mehlaya Şabanîye de HDPyî 6 hezar û 94 reyî, AKPyî 3246 reyî û mehlaya Esentepe de zî HDPyî 1528 reyî girewtî, AKPyî 1348 reyî.

BÎLÎR: ÎNAN WAŞT KE MA BÊŞERT ÎNAN RÊ SERRE RONÊ

3 muxtarê ke gure ra gîrîyayî ANFyî rê qisey kerd. Muxtarê mehlaya Şabanîye Çetîn Bîlîrî ard ziwan ke derheqê sebebê gure ra gîrîyayîşê înan de hewna teblîgatêk nêresayo înan. Bîlîrî vat seva ke HDPyî weçînitişê cayîyî yê 24ê Hezîrane de reyê berzî girewtê qeyûm Çîçeklîyî hendî kombîyayîşan de ê dawet nêkerdê.   

Bîlîrî ard ziwan ke „qeymeqam û qeyûm Çîçeklî ne şarî ra ne zî ma ra hes keno. La ma do yew roje, 1 saete zî fek ercanê xo ra vera nêdê.“  

KOMÎ: ÎNAN VEJÎYAYÎŞÊ REYANÊ BERZAN Ê HDPYÎ RA MA MESÛLDAR GIREWTÎ

Muxtarê mehlaya Suphanî Ayhan Komîyî zî vat ke nê qewimîyayîşî ra dima şar wayîr ro înan vejîyayo. Ard ziwan ke do weçînitişê 2019ê Adare de zî bibo namzed. 

Dewamê qiseykerdişê xo de vat: „Seva ke mehlayanê ma de HDPyî rê reyê berzî vejîyayî înan ma gure girewtî. 24ê Hezîrane de ra dima înan mehlayanê ma rê tu xizmetêk nêkerd,, bi hîsê qesasî têgêrenê.“

NANTO: VÎNAYÎŞÊ SÎYASÎYAN Ê BIRAYANÊ MI KERDÎ BEHANE

Muxtarê mehlaya Esentepeyî Ahmet Nantoyo ke gure ra gîrîya ard ziwan ke înan rê sebebêko fermî hewna nêvajîyayo û vat: „Ez zana ke înan vînayîşê sîyasîyan ê birayanê min ê ke nizdê HDPyî yê kerdî behane. Ma 8 bira yê û her kes fikrê xo de azad o. Labelê înan nê sey sûcêk dî. Weçînitişê vernîya ma de ma do newe ra bibê namzed.“