Nuştoxe û cigêrayoxe Nadîre Guntaş Aldatmaz vizêr Îstanbul de bi wesîleya Roja Ziwanê Dayîke ser o tehlukeyanê vera ziwanî ser o qisey kerd.

Xoşebere de bi desan kesî ameyî têhet. 

Nadîre aktîvîte de bi kirmanckî qisey kerd. Nadîre Guntaş Aldatmaz xoşebere de qalê rewşa kirmanckî ya Dêrsimî kerd û da zanayene ke merkezê Dêrsimî de kirmanckî hetê doman û ciwanan ra tay şuxilîyena.

Nadîre Guntaş Aldatmaz îfade kerd ziwan seba nasnameyê merdiman zaf girîng o û eke ziwanê neteweyêke vîndî bibo hinî nasnameyê ê netewe zî destî ra şono. 

Nadîre Guntaş Aldatmaz xoşebere de anketê ke şarê merkezê Dêrsimî de kerdê mojnayî û vat: ''Anketan de kesê ke xo sey 'tirk' pênase kenê û kesê ke dînê xo sey elewîtîye ney sey Îslamî pênase kenê hûmara înan nêzdîyê yewbînan a. Ma ney ra fam kenê ke ziwan û bawerîye di hetê girîngîyê nasnameyî yê û asîmîlasyonê nê wirdan ra yew zî asîmîlasyonê ê bînî xo de ano.''

Nadîre Guntaş Aldatmaz dîyar kerd ke rewşa kirmanckî hol nîya la felatê ci zî mumkîn o. Nadîte Guntaş Aldatmaz vat: ''Seba ke kirmanckî biciwîya ganî hetê qanûnan ra bipawîya. Seba mendebîyayîşê ziwanê ma perwerdeyê bi ziwanî şert o. Katalanya de zî ziwanê katalanan verê çinbîyayîşî de bi. La katalanan seba ziwanê xo, xo ver da û dewleta Spanya neçare mende ke perwerdeyê bi ziwanê katalanan bida. Bi nê hawayî rewşa ziwanê katalanan vurîyaye. Na nimûne seba ziwanê ma zî derbazdar a.''

Nadîre Guntaş Aldatmaz peynîya xoşebere de beşdaran rê sipas kerd û kitabê xo îmza kerdî.