DEM Partî  Komxebata Îdareyanê Herêmîyan ê Demokratîkan a 3-4ê tebaxe Wan de kerdbî.

Netîcenameyê komxebate ame eşkerakerdene. Netîcename de bale ameye antene nê çîyan ser:

''Partîya ma weçînayîşanê 31ê adare de bi temamî 78 şaredarîyî qezenç kerdî, 468ê ci cinîyî 1424 endamîyê meclîsê şaredarîyan zî qezenç kerdî. 

Nê şaredarîyan ra ber rojawanê Tirkîya de bi stratejîya 'pêkerdişê şaristanî' xeylêk destkewteyî ameyî destvistene. Partîya ma xûlasa weçînayîşan de rayîr nêda ferasetê tekperestîye yê îqtîdarê AKP-MHPyî. Ma weçînayîşan de dî ke sîyasetê Rayîrê Hîrêyînî senî bitesîr o. Ma do nê sîyasetî îdareyanê herêmîyan de pîlêr bikerê, komelkî bikerê.

Ma do vera hêrişanê serê kultur, ziwan û nasnameyê kurdan şaristananê azadan awan bikerê. Ma do vera rejîmê tekcamêrdî 'Hemwelatîyanê Azadan reyde, Ver Bi Şaristananê Azadan' şorê.

Îqtîdarê AKP-MHPyî weçînayîşanê 31ê adare ra dima dest na Şaredarîya Colemêrgî ser, Hemşaredarê Colemêrgî Mehmet Siddik Akiş tepişt. Ma do vera nê hêrişan wayîrê israrê xoîdarekerdişî vejîyê, destkewteyanê xo bipawê û vera ferasetê destsernayîşî newe ra şaristananê xo awan bikerê. Heta ke qeyûman bişawê ma do têkoşînê xo rê bi şîarê 'Ma do şaristananê xo zî, xo zî îdare bikerê' dewam bikerê.

Ma do sey her çaxî vera pêro hêrişan sîstemê hemserekîye û temsîlîya têdûşte vejîyê. Ma do şaredarîyanê xo de qetî nê sîstemî ra tawîz nêdê. Vera hêrişanê serê hemserekîye ma do bi qerardarîya 'Hemserekîye xeta ma ya mor a' têkoşîn bikerê.

Tecrîdê vera Birêz Abdullah Ocalanî beno sebebê krîzanê pîlan. Fikrê 'Komara Demokratîke' yê Birêz Ocalanî seba awankerdişê îdareyanê herêmîyan ê xurtan ercîyaye yê.

Îqtîdar bi polîtîkayanê cîya-cîyayan keno ke şaredarîyanê ma xesp bikero. La ma do vera polîtîkayan xo û şaristananê xo bipawê. 

Şaredarîyê ma keyeyê şarê ma yê. Ma do şaristananê xo tim bi paradîgmaya azadîgîra cinîyan, ekolojîke û demokratîke îdare bikerê. Ma do şaristananê winayênan awan bikerê ke tede demokrasîyo herêmî aver şîyo û sîyaset bîyo komelkî. Ma do bi qerardarîya 'Komelê rêxistinkerdeyî reyde ver bi îdareyanê herêmîyan ê demokratîkan' biresê armancanê xo.''