Konferansê Demokrasî û Azadîye yo 2. ê Berlinî 2 rojan ra dima vizêr qedîya. Konferans de derheqê metodê têkoşînê wextê ameyoxî yê Tirkîya de ercnayîşê girîngî ameyî kerdene.

Konferans de temsîlkarê dezgeh, rêxistinanê heqanê merdiman û sîyasetmedar, akademîsyen û aktîvîstî ameyî têhet û înan derheqê meseleyan modelê neweyî yê alternatîfî yê têkoşînî de qiseykerdişê girîngî kerdî.

Netîcename de wina ame vatene: ''Rixmo ke zerarê pîlî dîyayê ci Tirkîya de tradîsyonê têkoşînî esto. Îradeyê şaran, bi taybetî serkewtişê îdareyanê herêmîyan binkewtiş vindarna û ameyox aferna. Bi nê hawayî averberdişê îtîfaqanê demokratîkan, rolê aktîfî yê rêxistinanê kedkaran, têgêrayîşê cinîyan û muxalefetê ekolojîkî ameyî qetîkerdene.''

Dewamê netîcenameyî de bale ameye antene newe ra awankerdişê dezgehanê çimdarîye û hemsengîye, newe ra awankerdişê dezgehê muhakemekerdişî, meclîsêkê azadî, çapemenîyêka azade ser.

Netîceya konferansî de nê hîrê komê xebare ronîyayî:

-Koma Xebate ya Dîplomasî û Medyayê

-Koma Têkilîyanê Şarî

-Koma Xebate ya Heq û Edaletî

Netîcename bi na îdîa û qerardarîye qedîyeno: ''Konferans bi hêvîya dewamê nê atmosferê yewîye û paştdayîşî, pîlkerdiş û dewamkerdişê îtîfaq û têkoşînê hemparî heta awankerdişê Tirkîyaya demokratîke do bixebito. Bi hêvîya ke konferanso hîrêyîn do Tirkîya de bêro kerdene.''