Vervatoxa Têkilîyanê Teberî ya KNKyî Nîlufere Koç derheqê vengdayîşê ‘Haştîye û Komelê Demokratîkî’ de ajansê ma rê qisey kerd.

Nîlufere pare kerd ke rixmo ke di mengî bîyo vengdayîşê Rayber Apoyî qewimîyayîşê girîngî afernayê û vat: ‘’Hem zere û hem zî teber de no vengdayîş yeno nîqaşkerdene. Vengdayîşî bi qewimîyayîşanê girîngan di mengî xo pey de verdayî. Vengdayîşê ‘Haştîye û Komelê Demokratîkî’ heman wextî de projeyêk o. Seba vurnayîşê dewlete Rayber Apoyî projeyêk pêşkêş kerd û seba haştîye mesuldarîya xo arde ca.

La dewlete hema zî verê nê vengdayîşî de gamêka zelale nêeşte. Kurdan Newroze de mojna ke ê peyê nê vengdayîşî de yê. PKKyî xora adirbirnayîş îlan kerd. Hetê kurdan ra tewir zelal o. La mesele na ya ke dewlete qetî game nêerzena. Hetê bînî ra mîyanê dewlete dormeyêko hêrişker est o ke çareserîye nêwazeno, hem zî polîtîkaya teberî de dişmenîya vera kurdan dewam kena. Şer dewam keno.’’

Nîlufere da zanayene ke têkoşînê kurdan zor da dewleta tirke coka dewlete şîyê verê Rayber Apoyî. Nîlufere vat: ‘’Rojawan û Başûrê Kurdîstanî de kurdî bîyî wayîrê heqanê xo. No polîtîkaya teberî de dewleta tirke rê bi teda. Teber de Wezîrîya Teberî ya Tirkîya dişmenîya kurdan kena.’’

Nîlufere bale ante ser ke seba ke proses bivurîyo demokrasî ganî Rayber Apo Îmraliyî ra bêro vetene. Nîlufere vat: ‘’Heta ke Rayber Apo Îmrali de bibo şîyayîş û ameyîşê zîndanî do binê kontrolê dewlete de bibê. No yeno a mana ke dewlete key biwaza eşkena pêvînayîşan bibirna. Ganî Rayber Apo bieşko bi serbestî tewrê prosesî bibo. No proses krîtîk o û sey aktorê verênî ganî Rayber Apo tewrê ci bibo.’’