Çalakîya nobete ya ke vera hêrişanê îşxalî yê dewleta tirke ya îşxalkere û çeteyanê ci yê SMOyî sînorê Nisêbîn-Qamişloyî de dîyaye destpêkerdene kewte roja 21ine.

Şaro ke saetanê serê sibayî de Parka Barişî de ame têhet bi sloganan saeta rayraşîyayîşî pawit. Dayîkê Haştîye, merdimê tepişteyan, alîmê dînî, temslîkarê rêxitinanê elewîyan, cinî û ciwanî zî tede des hezarî ra zafêr kesî ver bi sînorî rayra şîyî. Rayraşîyayîş de pankartê sey "Bi rihê seferberîye emê şoreşa Rojava biparezin", "Rojava rûmeta meye", "Rojava rûmeta mirovahiyê ye Rojava biparezê" û  "Li Rojava aşitî, li cîhanê biratî" ameyî akerdene.

Şaro ke bi vatişê marşan rayra şi sloganê sey "Bijî berxwedana Rojava", "Rojava dilê me berxwedan karê me", "Bijî Derik Apo" vatî û fotografê rojnamegeran Nazim Daştan û Cihane Bîlgînî kiriştî ke hêrişê hewayî yê dewleta tirke de şehîd bîyî.  Badê rayraşîyayîşî sînorê Qamişloyî cayê nobete de eşkerayîye ameye dayene.

Seyda Babeyê Xelatî ke bi nameyê Kongreya Îslamê Demokratîkî (DÎK) qisey kerd, veng da şarê kurdî ke wa semedê haştîye bibo yew û şaranê Tirkîya ra zî waşt ke wa wayîrê têkoşînê kurdan bivejê.

Mustafa Karabukdakî ke bi nameyê Komeleya Elewîyanê Demokratîkan (DAD) qisey kerd, semedê wayîrvejîyayîşê Rojawnî veng da û vat ê sey elewîyan tim cayê mazlûman de yê û veng da rayapêroyîya dinya ke wa vera nê sûcanê şerî bêveng memanê.

Vervatoxa DEM Partî Ayşegule Dogan zî nê vatî: ''Sînoro ke kerdo mabênê ma nêeşkenê bikerê zerrîya ma. Rojawan cayê ma yo tewr erjîyaye yo. Coka ma wayîrê Rojawanî vejîyenê. Na nobete nobeta vengdayîşê haştîye ya. Kurdî her ca de xover danê. Ma wazenê bi nasname û kulturê xo biciwîyê. Wa hinî gonî merişîyo. Birêz Ocalan 26 serrî yo binê tecrîdê giranî de yo. Ma sey DEM Partî peyê vatişanê Birêz Ocalanî de yê. Ma semedê berpirsîyarîya tarîxî hazir ê. Tîya dayîkê zervêşayeyî rayîr pawenê. Pawenê ke wa zîndanî bibê veng. Pawenê ke wa nasnameyê înan bêro naskerdene. Şarê ke bedelo gird dayo tîya haştîye wazeno.''