Nobeta Azadîye seba azadîya Rayberê Şarê Kurdî Abdullah Ocalanî 25ê hezîrana 2012î ra nata şaristanê Strasbourgî yê Fransa de dewam kena. Hewteyê 608ine de Koma Oldenburgî nobete dewr girewte.

Kome de kurdîstanijî Dadaş Kutucu, Delîl Xinis, Hediye Xelîl û Sarya Zerdeşt cagênê.

Nameyê kome ser o Dadaş Kutucuyî qisey kerd û Komployo Mîyanneteweyî şermezar kerd. Kutucuyî vat: ''Rayberê ma seba çareserîya meseleya kurdan amebi Ewropa la dewletanê îşxalkeran o teslîmê Tirkîya kerdbi. Rayberê ma 25 serrî yo zîndan de yo û hîrê serrî yo ey ra xeberêke nêna girewtene. Seba ke têkilîya Rayber Apoyî ya bi kurdan biqeda no tecrîd yeno caardene. Ma pêro hêzanê komplogeran rê vanê ke Rayberê ma bi fikranê xo mîyanê ma de yo. Şarê kurdî do tim wayîrê Rayberê xo vejîyo. Wayîrvejîyayîşê Rayberîye, wayîrvejîyayîşê merdimatîye yo. Ma do heta çilka peyêne ya gonîya xo hetê Rayberîya xo de bibê.''

Kutucuyî şarê kurdî ra waşt ke verê xo bido Strasbourgî.