Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser Amed de çend mengî verê cu Nobeta Edaletî dayebî destpêkerdene. Dima ra Wan û Îzmîr de zî çalakîyan dest pêkerd.

Çalakîya Amedî ya ke Baroyê Amedî yena kerdene roja 95.  de ya. Çalakwanan ra Nazîme Boltanî vat: ''Hem ma rê hem zî qicanê ma rê bi seran o îşkence kenê. Wazenê ke kurdî tim dej biancê. Bêvîjdanê, coka wina kenê. Seba ke qicê ma kurdê zîndanan de yenê tepiştene. Qicê ma ke bîlasebeb yenê tepiştene wa bêrê veradayene.'' Nuraye Abay zî vat: ''Her roje erzenê koguşanê tepişteyanê sîyasîyan ser û çî-mî înan ê taybetî serûbin kenê. Merdimê tepişteyanê ke xora rayîrê dûrî ra şinê qay merdiman xo wextê pêvînayîşê înan zî yew saete ra kerdo nêm saete. Wa merdimê ma yê nêweşî bêrê veradayene ke ma înan tedawî bikerê, miqatê înan bi.''

Nobeta ke Baroyê Îzmîrî de yena kerdene kewte roja 6. Aktîvîstanê TJA, Mayanê Haştîye û HDKyî çalakwanî zîyaret kerdî. Cinîya tepişte Abdullbahrî Yildirimî Hanime Yildirim vist vîrê ke mêrdeyê ci 29 serrî yo zîndan de û xeylêk nêweşîyê ci estî û waşt wa tepişteyê nêweşî cade bêrê veradayene. Maya Firat Yagmekanî Sultane Yagmekanî ard ziwan ke zîndanan de zaf zext esto vat: ''Ma wazenê ke wa no zext, zulm hinî biqedîyo. Vera tepişteyanê sîyasetê dişmenî rayra benê ke wa tepişteyî zîndanan de bimirê. Ma heqdar ê û nê zulmî qebul nêkenê. Wa hinî zîndanan ra tabûtî mevejîyê.''