Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser 87 rojî yo Amed Nobeta Edaletî tepişenî. Merdimê tepişeyan ewro ameyî têhet û zulmê vera tepitşeyan protesto kerd.

Çalakîye vera banê Edlîyeya Amedî de ameye kerdene. çalakwanî xeylêk wext hetê polîsan ra gerîyayî binê ablûqa. Hemserekê Pêroyî yê Komeleya Huqûqnasanê Seba Azadîye (OHD) Bunyamîn Şeker û Serekê Baroyê Amedî Nîhat Eren zî tede avûkatî û merdimê tepişteyan kerd xo çeng û peyser game nêeşte. Wekîlan û îdarekaranê HDPyî yê Amedî û endamanê Med TUHAD-FED û TUHAY-DERî zî paştî daye çalakîye. Polîsan destûr nêda xeylêk temsîlkarê dezgehanê sîvîlan ke tewrê çalakîye bibê.

Merdimanê tepişteyan ra Încî Guler waşt tepişteyê ke 30 serrî yo zîndan de yê nêweşê wa cade bêrê veradayene. Gulere vist vîrî ke Anqara de soz dîya înan ke do mesele bêro rojdem la sozê  ke dîyayî nêameyî caardene. Reşahate Ada zî ard ziwan ke ê nêwazenê ke merdimê înan hinî zîndanan ra pê tabûtan vejîyê. Nuraye Abay zî îfade kerd ke  ê haştîye wazenê û vat wa hinî dayîkî mebermî.  Çalakîye bi slogana '' Wa  biciwîyo xoverdayîşê zîndanan'' qedîyaye.