Îzmîr û Îstanbul de nobeta vera destsernayîşê Şaredarîya Colemêrgî vizêr zî dewam kerd. 

Îzmîr de verê Sumerbankî de girseyî ancî tîşortê bi nuşteyê ''Vera qeyûmî ma nobeta edaletî de yê'' xo rê kerdî û pankarta ''Şaredarîye yê ma ya'' akerde. Nobete de Îdarekara TÎPî Sena Yazibagli ard ziwan ke no îqtîdaro ke sindoqan û îradeyê şarî rê hûrmet nêkeno, yew meşrûtîyetê ci nêmendo.Endama Înîsîyatîfê Têkoşînê Sosyalîstî Tugçe Kizildemîr îfade kerd ke ferasetê qeyûmî polîtîkayanê kolonyalîzmî ra cîya nîyo. Qiseykerdişan ra dima Şubeyê Îzmîrî yê Komeleya Elewîyanê Demokratîkan bi wesîleya menga Muharemî germîya îmaman vila kerde.

Îstanbul de ancî Meydanê Şîşhaneyî yê Beyogluyî de nobete dewam kerd. Çalakîyan de şarî tîşortê bi nuşteyê ''Qeyûmî def bê'' kerdî xo rê û sloganê sey “Bijî berxwedana Colemêrgê” û “Qeyûm dê biçin em ê bimînin” vatî. Hemserekê DEM Partî yê Beyogluyî Yunus Onalî çalakîye de vat ke ê do tim vera ferasetê qeyûmî xo ver bidê.