Dewleta Tirkî seba ke Kurdistan û Tirkîya de dînamîkanê muxaletê cimatkî afîşe bikero û verê kesanê ke nê wareyan de xebatan kenê bigêro, her roje yew metod xebitnena. Îqtîdarê MHP-AKP’yî, teberê trolê ke medyaya sosyale ser o awan kerdê û merdiman afîşe û lînc kena de, otelan, dadgehan, hepisxaneyan, nêweşxaneyan û teyaragehan de zî sîstemê sehnayîşê zanayîş ê pêroyî (GBT) awan kerdî. Nika zî vejîya werte ke Wezaretê Edeletê Tirkî û Wezaretê Zereyî, seba kesanê ke derheqê ci de qerarê tepîştişî esto, wazena ke bi sîstemê GBT’yî noterîyan ser o tepîştişê.

Ame zanayen ke no sîstem bi zextê wezaretan Yewîya Noterîyan a Tirkîya (TNB) de ameyo awankerdene. Wexto ke kesêk şiro noterîyan û bi nasnameyanê karêk bikero, eke derheqê ci de qerarê tepîştişî ke bibo, zanayîşê ci gunenê no sîstemo ke ameyo awankerdene ro û cendirme yan zî polîsî hema dest bi karî kenê. Noterîyê ke merdimî bêxebera nê sîstemî şinê karê xo kenê, bi destê wezaretan bi zor yeno ajankerdene. Noterî zanayîşê kesanê ke derheqê ci de qerarê tepîtiş esto bo yan zî çin bo danê sîstemî ro û asayîş û teşkîlatê cendirmayan zî bi nê zanayîşan nê kesan nêzdîye noterîyan de tepîşenê.

Hetê bînî ra kesê ke noteran de nênê tepîşenê zî, seba ke bêrê tepîştiştene polîsî noterîyan ra qeydê înan ê kamerayan gênê û teqîpkerdişê ci domnenê. Noterê ke na rewşe ra nerehet ê, na babete de zanayîş dayî TNB’yî, nayê ser o TNB’yî Wezaretîya Edeletî de pêvînayîşî kerdî. TNB’yî Wezaretîya Edeletî waşt ke ê nêwazenê nê meseleyî de teref bê û nê sîstemî bi destê nînan nêdê kerdene. Ame zanayene ke selahîyetdaranê wezaretî zî cewabê “Ne şima bi waştişo winasî ameyî ne zî ma no şima ra heşnayo. Eksê ci de ma eşkenê şima sey cimatkaran zî name bikerê” dayo ci.