Komeleya Huqûqî ya Semedê Azadîye (OHD) derheqê tercrîdê serê Rayrberê Şarê Kurdî Abdullah Ocalan, Hamili Yildirim, Omer Hayri Konar û Veysî Aktaşî yê ke 40 mengî yo înan ra qet xeberêke nîna girewtene, muracatê Baroyê Îstanbulî kerd. Badê muracatî Baroyê Îstanbulî de ke Taksim Beyoglu de ya, eşkerayîya çapemenîye ameye dayene.

Eşkerayîye hetê Hemsereka OHDyî Eda Onal ra ameye dayene. Onale bale ante ser ke 40 mengî yo Îmraliyî ra xebere nîna girewtene û nê vatî: ''Heme muracatê pêvînayîşî yê avûkatan û keyeyan bi sebebanê bêhuqûqî yenê astengkerdene. Birêz Abdullah Ocalan panc serrî yo nêeşkeno avûtanê xo bivîno û Hamili Yildirim, Omer Hayri Konar û Veysî Aktaş zî 2015î ra nata seke ameyî berdene Îmrali hema avûkatê xo nêdîyî. Bêhuqûqîya ke Îmrali de bena hema dinya de nêameya vînayene.  Îmrali sîstemê huqûqî de qula sîya ya.

Ma sey avûkatanê OHDyî vanê tecrîdê Îmraliyî eynî wextî de yeno manaya çarsernêkerdişê meseleya kurdan ke meseleya tewr bingeyî ya Tirkîya ya û seba ke na qûla sîyaye dahîna zaf zirar medo şarî ma semedê wadaritişê tecrîdî tay xebatî kerdî. Ma muracatê xeylêk dezgehanê eleqedaran ê neteweyî û mîyanneteweyî kerd la heta ewro hema muracatê ma nêameyî cewabkerdene û gamêke nêameye eştene. Ma semedê tepişteyanê Îmraliyî muhakemekerdişê edîlî wazenê. Ma veng danê baroyan û dezgehanê komelê sîvîlî ke wa xeta têkoşînî ya hempare bêro xurtkerdene.''