Serekwekîlê Grûba Partîya Demokeratîke ya Şaran (HDP) Saruhan Oluçî derheqê operasyonê vera partîya ci yo ke vizêr serê sibayî ame kerdene de ANFyî rê qisey kerd.

Oluçî ard ziwan ke yeno waştene ke bi destbendkediş û tepiştişan HDP bêro tasfîyekerdene û vat nê operasyonî leteyêke planê çokdayîşî  yê serra 2014î yê. Oluçî vist vîrî ke îqîtîdarê AKP-MHPyî hem sîyasetê teberî de hem zî ê zereyî de binkewt û vat: ''Na gama tasfîkerdişê HDPyî û heme îtîfaq û bespesteyanê ci ya. Proseso ke 2016 de bi tepiştişê hemserekan û parlamenteranê HDPyî dest pêked ewro ame na nuqta. Cipersayîşê qewimîyayîşanê 6-8ê teşrîna verêne 2015 de ame destpêkerdene la heta ewro gamêke nêerzîyaye. Nika xîret kenê ke planê xo yê çokdayîşî ser bifînê.''

Oluçî bale ante ser ke  îqtîdarî çîyo ke destê xo eşt ci destê înan de mend û vat: ''Teber de zî zere de zî vînî kerd. Nika bi hêrişê vera HDPyî, dişmenîya vera kurdan û hêzanê demokrasîyî mend, naye cerbinenê. Hetê ekonîmî û sosyalî ra krîz esto. Vayîya cuya zaf berza û bêkarîye çend şino zêdêr bena. Seba ke şar tengayîya ke anceno mevîno rojdemî bedilnenê û huqûqê dişmenî şuxulnenê. La ê se kenê wa bikerê ameyî peynîya rayîrî.''

Oluçî ard ziwanke goreyê antketanê îqtîdarî zî înan zaf rey vînî kedî û vat: ''Muxalefetê komelî û sîyasalî vera nê operasyonê peyênî tewiro pêt ramojna. Hem partîyanê sîyasîyan hem dezgehanê komelê sivîlî û hem zî hemwelatîyan de tewiro cîddî esto. Hînî kesêk dişmenîya vera kurdan û HDPyî qebul nêkeno. No zî destê înan ra vejîya, hînî çîyêk nêmend. Ma înan pê zulm û bêhuqûqîya înan têna verdenê. Ma do waştişanê xo bifînê dest û miheqeq ser bikewê. Ê do zaf gird vînî bikerê. Seba ke huqûq, edalat, heq û azadîye binpay kerdî do rojêke bêrê muhakemekerdene. Semedê naye zî ma  do têkoşînî rê dewam bikerê.''