Serekwekîlanê grûba HDPyî Merale Daniş Beştaş û Saruhan Oluçî derheqê oprasyonê vera partîya înan de meclîs kombîyayîşê çapemenî kerd.

Oluçî vat: ''Îqtîdar bi rayîrê hukmî wazeno ke HDPyî tasfîye bikero. Mabên de heq û huqûq nêmend, her çî bi qerarê Qesre û destê mehmemeyê ke sey komîsyonê edaletî yê AKPyî têgêrenê beno. No operasyonêko huqûqî nê sîyasî yo. Seba ke îqtîdar HDP û hêzanê demokrasî xo rê sey tehluke vîneno no operasyon kerd. Eynî wextê de operasyonê qesasî yo. Polîtîkayê hukmatî yê tewber û zereyî pîya binkewtî. Seba ke bi sîyasetî nêeşkenê HDPyî bi rayîrê hukmî wazenê çîn bikerê. Derdê înan çînkerdişê HDPyî yo. La naye nêvînenî HDP tewr tay 6 mîlyon weçînayoxan temlîs keno  ke pîya keyayanê înan keno 20 mîlyon. HDP partîya pîle ya hîrên a Meclîsî û Tirkîye ya.

Badê protestoyanê 6-8ê teşrîna verêne 28ê sibat a 2015î de Dolmabahçe de metnê mutaqabatî ame wendene. Nê fotografî de zî yeno vînayene kombîyayîş de îdarekar û wekîlê  AKPyî Mahir Unal, Efkan Ala û Yalçin Akdogan  estê. Wekîlanê ma ra êyê ke tewrê nê kombîyayîşî bîyî înan ra Îdrîs Balulen nika zîdan de yo, Sirri Sureyya Onder nezarat de yo û yeno îdîakerdene ke derheqê hemsereka ma Pervîne Buldan de zî fezleke yeno amedekerdene. Nika ma reyna persenê, 5 aşmî dimayê protestoyanê Kobanê şima qey înan de yew masa de nuştê ro û 5 serrî dima ra bi operasyon destbend kenê. Ma wazenê wa her çî eşkera bo. Wayîrvejîyayîşê HDPyî nîno manaya wayîrvejîyayîşê heme polîtkayaan ci, ewro wayîrvejîyayîşê ci wayrîvejîyayîşê têkokoşînê demokrasî, azadîye û haştîye yo. HDP rixmê heme zextan nêkewt û do mekewo.''

Merale Daniş Beştaş zî vist vîrî ke merkezê qerarî yê HDPyî 29 kesan ra nîno raameyene û vat: ''Merkezê qerarî yê HDPyî şar o. Pê nê operasyoanan şima nêeşkenê vengê HDPyî bibirnê û têkoşînî ci biqedînê. Sey vizêrî, ewro zî siba zî do vera zextanê şima têkoşînê ma bêro domnayene. Berpisîyarê kesanê ke protestoyanê Kobanê de merdî AKP yo. Dozgerê ke Qesr de xelatê xo girewt dima ra no operasyon da destpêkerdene. Şima se kenê bikerê, vera têkoşînê şarî  şima do tewr peynî vînî bikerê.''