Wekîlê DEM Partî yê Riha Omer Ocalanî Ajansê Mezopotamya rê qisey kerd. 

Omer Ocalanî bale ante ser ke Rayberê Şarê Kurdî Abdullah Ocalan bi hawayêkê bêhuqûqî tepişîyayo û 26 serrî yo yeno tecrîdkerdene. Omer Ocalanî vist vîrî ke Mehkemeya Heqanê Merdiman a Ewropa 2014 de derheqê tecrîdê Îmraliyî de bira binpaykerdişî dabî. 

Omer Ocalanî vat: ''Tirkîya Birêz Ocalanî vera şarê kurdî sey hacetê şantajî şuxilnena û peymananê mîyanneteweyîyan qetî nêana ca. Tirkîya Îmrali de hem huqûqê xo hem zî huqûqê mîyanneteweyîyî binpay kena. 42 mengî yo ma nêeşkenê Îmraliyî ra xeberêke zî bigêrê. Tirkîya cara derheqê babete de eşkerayîyêke nêdana. Dewletê mîyanneteweyîyî zî seba ke menfaetanê xo bipawê tecrîdî rê vengê xo nêkenê. Coka ganî ma bi xo xo ver bidê.''

Omer Ocalanî bale ante Hemleya 'Abdullah Ocalanî rê Azadîye, Meseleya Kurdan rê Çareserîye' ser û vat: ''Mîtîngê 13ê teşrîna verêne zaf girîng a. Ganî Kurdîstanî ra pêro merdimî a roje Amed de bêrê pêser û vera polîtîkayanê tecrîdî vinderê. Ma wazenê sey keyeyêkî cade Birêz Ocalanî bivînê. Ganî her kes zî paştî bido ma. Birêz Ocalan lîderê kurdan o. Şarê ma ganî mesuldarîya xo bîyaro ca.''

Omer Ocalanî ard ziwan ke Kurdîstan de şer est o û faturaya nê şerî zî şarî danê. Omer Ocalanî vat: ''Dewlete budçeya şarî dana şerê vera kurdan. Ganî her kes nê şerî ser o bifikiro. Bi qiseyê 'dewlete ha destê ma ra şina', şerê vera kurdan yeno meşrûkerdene. Eke ewro ekonomîya Tirkîya nê halî de ya sebebê ci no şer o.''