Fermandarîya Hêzanê Asayîşê Zereyî yê  Rojawanî da zanayene ke operasyonê asayîşî yê Kampa Holî roja 6. de bi serkewtişî qedîya.

Operasyono ke 18ê nîsane de bajarê Hesekê yê Kantonê Cizîrî de dîya destpêkerdene hetê Hêzanê Asayîşê Zereyî, QSD û YPJyî ra ame kerdene.  Netîceya operasyonê 6 rojan de 20 çeteyê DAÎŞî û hemkarê ci ameyî tepiştene û xeylê çeke û muhîmat ame destfînayene.

Eşkerayîye de ame vatene ke hucreyêko zereyê kampe de yo hucreyêkê teberê kampe de reyde organîzekerdêne ke remayîşo komkî bêro kerdene la bi nê operasyonî remnayîşê înan ame astengkerdene û endamê hucreyî ameyî tepiştene.

Peynîya eşkerayîye de ame vatene ke heme herêman de vera tehdîtanê asayîşî do operasyonî dewam bikerî û ame vengdayene ke wa şar vera çîyanê şikdarana hîşyar bo û hêzanê asayîşî reyde hemkarîye bikero.