Seba ke deyîranê kurdkî reyde govende girewta heta nika 12 kesî tepişîyayî. Êyê ke tepişîyayî hêverî medyaya dîjîtale de sey hedefî ameyî mojnayene, agahîyê nasnameyanê nînan pare bîyî û dima tepişîyayî. 

Hemvervatoxa Komîsyonê Kultur û Ziwanî yê DEM Partî Avûkate Cemîle Turhalli Balsak derheqê babete de ANFyî rê qisey kerd.

Cemîle Turhalli Balsak ard ziwan ke kesê ke turk û sûnî nîyê seba îqtîdarî hedefê hêrişan ê û vat: ''Vera şaranê Tirkîya înkar û cîyakerîyêka tûje est a. Hêrişanê Mereş û Çorumî ra heta nika vera hêzanê sey kurdan hêrişî yenê kerdene. Îqtîdar ewro hêrişê merdimanê ke bi kurdkî qisey kenê, keno. Ziwanê îqtîdarî yo hêrişker û nîjadperest zî kurdan keno hedefê komelî''

Cemîle dîyar kerd ke deyîranê kurdan de govende, coşê înan de zî rêçê xoverdayîşî est ê. Cemîle vat: ''Kurdî nêeşkenê heqanê xo yê hemwelatîyan ra fayde bivînê. Ziwan, kultur, heqê weçînayîşî û govende kurdan rê qedexe yê. Çunke nê çîyî pêroyî parçeyê nasnameyê kolektîfî yê neteweyêke yê ke bi hawayêkê xobawerî vanê 'ez tîya de ya.'

Govenda kurdan bi qiseyan hişê xo yê xoverdayîşî vurnena coşî û kelecanî. Oyo ke ê daymîşê ci nêbenê no coş û xoverdayîşê ma yo. Eke şima înan rê bipersê vanê qiseykerdişê bi ziwanê xo mesele nîyo, oyo ke mesele yo ma çi ser o qisey kenê. Yanî îqtîdar wazeno bire bido ke ma çita ser o qisey bikerê. La şima bi tewirê xo mojnenê ke sey îqtîdarî nêfikirîyenê.''

Cemîle pare kerd ke medyaya dîjîtale sey kuçeyan bitehluke ya û vat: ''Îqtîdar bi tersnayîşê komelî û ciwanan hêrişê govend û xoverdayîşê ma keno. Îqtîdaro ke nêeşkeno kuçeyan kontrol bikero hinî medyaya dîjîtale ser ra hêriş keno. Tepişîyayîşê ê ciwananê ke govende girewta ra dima wesayîtê polîsan de deyîra 'olurum turkiyem' bi nînan ameya goşdarîkerdene. Yanî werte de hêrişêko plankerde est o. Wezîrê Edaletî bi xo hedefmojnayîşî ra kêfweş o.''

Cemîle vist vîrî ke qiseyê 'Bijî Serok Apo' sûc nîyo û vat: ''Mehkemeya Heqanê Merdiman a Ewropa û Mehkemeya Berze no slogan sûc nêdî. La mesele na ya ke bira ney hetê MHPyî ra dîyena. MHP bi ferasetê 'Ma do tarûmar bikerê' têgêreno. Sîyaset tesîrê mehkemeyan keno.  Dewletanê totalîteran ê sey Tirkîya de nêzdîbîyayîşê di hetî yê dewlete yê vera nasnameyan est ê. Oyo yewin dewlete goreyê krîteranê huqûqî tênêgêrena. Oyo diyîn dewlete cîyakerîye kena. Nê welatî de kurdkî qedexe ya, govende sûc a, kincê folklorîkî qedexe yê. Nê pêroyî sey terorîzmî sûc yenê dîyene.

Îqtîdar bi hawayêkê şiklî xo sey dûştê qiseykerdişê bi kurdkî û kincanê herêmîyan nêmojneno zî dişmenîya nasname û kulturê kurdan keno. Ma eşkenê bi qiseyanê xoverdayîşî û polîtîkan ê xurtan estbîyayîşê ziwan, kultur, nasnameyê xo bidê pawitene. Govenda kurdkî zî nika qise û sembolê nê nasnameyê xoverdayîşî ya.''