Avûkatanê Baroyê Amedî ra Şivan Cemîl Ozenî derheqê polîtîkaya tecrîdî ya Îmraliyî û grevê vêşanîye yê vera tecrîdî de ANFyî rê qisey kerd.

Ozenî da zanayene ke Tecrîd prosesêkê îzolasyonî yo, îşkence yo. Tecrîdê vera Birêz Ocalanî tesîrê pêro komelî keno. O sey aktorêkê sîyasî dîyeno. Rolê ey prosesê çareserîye de zî bi zelalî dîya. Heqo xozayî yo ke tepişteyî keye û avûkatanê xo bivînê. La dewlete destûr nêdana le Birêz Ocalan pê telefonî zî qisey bikero. Cewabê vera muracatanê Buroyê Huqûqî yê Asrinî ney eşkera kenê. Tecrîd îşkence yo, nê sûcê ser o wext derbaz nêbeno coka kesê ke nê sûcî kenê rojêke do bêrê muhakemekerdene. Sîstemo ke Ocalan keno hedef hetê huqûqî ra yew îzehê ci çin o.''

Ozenî pare kerd ke ganî pratîkê rejîmê Îmraliyî û vilakerdişê xeberanê serê weşîya ey heman çarçewe de bêrê ercnayene û vat: ''No provakasyon komel tehrîk keno. Serdozgerîya Komare ya Bursa eşkera kerd ke ê do derheqê îdîayan de cigêrayîş bikerê. Yanî înan îdîayî red nêkerdî. Êyê ke îdîayê 'mergî' vila kerdî wa cade bêrê tepiştene. Ganî Abdullah Ocallan cade keye û avûkatanê xo reyde pêvînayîş bikero.''

Ozenî bale ante grevê vêşanîye yê tepişteyan ser û vat: ''Tepişteyî 120 rojî yo grev de yê û wazenê ke wa Birêz Ocalanî reyde pêvînayîş bêro kerdene. Hêzê demokrasî û zerrîwazê demokrasî ganî balan biancê nê qedexeyê pêvînayîşî ser. Ganî partîyî, rêxistinê komelê sivîlî bi na mesuldarî têbigêrê.''