Serekkomaro AKPyij Tayyip Erdogan ewro Soçî de do Serekê Dewlete yê Rûsya Vladimir Putinî reyde bêro têhet. Bado ke Tirkîya kewt atmosferê vîjnayîşî îqtîdarê AKPyî eşkerayîyê xo yê derheqê hêrişê vera Rojawanî de zêdînayî. Îqtîdarê APKyî bi krîzê Rûsya-Urayna û endamîya NATOyî ya Finlandiya û Swêdî  pêyê şansê operasyonî de yo. Nê mabênî de hêrişê topan ê Tirkîya de qezaya Zaxoyî de 9 erebî ameyî qetilkerdene û vera nê qirkerdişî nêrazîbayîşî zêdîyenê. Wekîlê HDPyî Hîşyar Ozsoyo ke Komîsyonê Têkilîyanê Teberî de ca geno Ajansê Mezopotamya (MA) rê rewşa Iraqî û hêrişanê Tirkîya yê vera Rojawanî de qisey kerd.

Ozsoyî vist vîrî ke hêrişê vera Iraqî newe nîyê û vat: ''2015 ra nata 130î ra zafêr kurdê sîvîlî hêrişan de dinyaya xo bedilnaye. Çi hey ke ma reyna dî ke eke kurdî bimirê ne semedê şarê Iraqî, ne semedê Îdareyê Herême yê Kurdîstanî ne zî rayapêroyîye ya mîyanneteweyî de yew qiymetê ci çîn o. Zaxoyî ra dima rîyê zextanê ke kuçeyanê ereban ra ameyî îdaryê hukmatê Iraqî û Herêma Kurdîstanî zelal tewir girewt. Verî hende kurdî nê hêrişan de merdî, qet vengê çewî nêvejîya. 

Nika yeno waştene ke wa Tirkîya Iraq ra vejîyo. Babete ameye berdene Neteweyê Yewbîyayeyî la  pratîk de tiway nêbedilya. Baregeh û leşkerê Tirkîya hema uca de yê. Tirkîya badê Zaxoyî pozîsyonê hêrişî ra ravêrt pozîsyonê pawitişî. Eke Iraq de bêîstîkrarîye dewam bikero îqtîdarê AKPyî herême de dahîna ca dano xo. Tirkîya hêzêkê NATOyî yo. Eke Sûrîye û Iraq de averşîyayîşêko xirab bibo, Ewropa tersê multecîyan ra do paştî bido Tirkîya.''

Ozsoyî vat: ''Erdogan verê vîjnayîşî sexte bi zî hewceyê yew serkewtişî yo. Planê ke ameyî kerdene Amerîka, Rûsya û Îranî tesdîq nêkerdî. Wezîra Karanê Teberî yê Almanya Annalena Baerbocka ke hewteyo ravêrte ameye Tirkîya verê kamerayan de vat ê operasyonî xelet vînenî. Almanî çîyo winayên raya verêne kenê. Proseso winayên wexto ke Wezîrê Karanê Teberî yê Swêdî amebi zî qewimîyabi. Ewropa û Amerîka nê raşt nêvînenê. Erdogan kewtê Rûsya dima ke wa waştişê ci tesdîq bikero la pêvînayîşanê Astana de Îran zî zaf zelal pozîsyonê xo bewlî kerd. Rixmê nînan beno ke Tirkîya operasyon bikero.

Hîşyar Ozsoyî wina dewam kerd: "Hêrişê Til Rifat û Minbicî kenê. Nizdîyê Til Rifetî de nuqteyêka heme rayîrê pabestayîşî tira ravêne est a. Mîlîsê Îranî, artêşa Sûrîye û hêzê QSDyî uca de yê. Şer û pêkewtişî artêşanê Iraq û Sûrîye zî ancanê mîyanê xo. Tirkîya ke serkewtiş wazenê beno ke zaf xirab bin bikewo. Uca mabênê kurdan û Tirkîya û çeteyanê ci de şerêk nêbeno, do şero dahîna pîl o herêmî bêro kerdene. Verê vîjnayîşî hêrşê îşxalî yê vera Rojawanî rojdemê înan de yo û eke firset bivînê do cade bikerê. Eke Tirkîya çimanê xo bigêro û hêrişê Rojawanî bikero no do şerêko rehet mebo. Hem kurdan amadekarîya xo kerda hem zî zaf hêzî est ê ke wazenê ke wa statukoyê Sûrîye bibedilîyo. Ê zî do tewrê şerî bibê. Rewşa winayêne de eke Erdogan nê şerê ke kes nêwezano bikero do bedelê ci hetê leşkerî û sîyasîyî ra zaf giran bo.''