Vervatoxê Komîsyonê Têkilîyanê Teberî yê HDPyî Hîşyar Ozsoyî derheqê zîyaretê Tirkîya yê Serekê Meclîsê Parlamenteran ê Konseya Ewropa (MPKE) Rik Deaemsî de ANFyî rê qisey kerd.

Ozsoyî pare kerd ke mabênê Konseya Ewropa û Tirkîya de wextêkî ra nata alozîye esta û Tirkîya reyna daxîla prosesê teqîbkerdişî ameye kerdene. Ozsoyî îfade kerd ke nê wextî ra nata Tirkîya de binpaykerdişê heqanê merdiman nêameyî çareserkerdene.

Ozsoyî vat: '' Daemsî waşt ke nê meseleyan selahîyetdaranê Tirkîya û parlamenteran reyde qisy bikerê.Wedaritişê Peymana Îstanbulî, dewaya qefilnayîşê HDPyî, xespkerdişê wekilîya Omer Faruk Gergerlîogluyî û o zîyaret heman wextî de qewimîyayî. 3 rojdemê zîyaretî estê; birê Mehkemeya Heqanê Merdiman a Ewropa, raporê teqîbkerdişî û mesuldarîyê ke Tirkîya nêana ca. Rojdemo diyîn zî tedaya vera muxalefeto ke pê dewaya qefilnayîşê HDPyî zêdîyaye. Oyo hîrêyîn zî wedaritişê Peymana Îstanbulî yo ke bi taybetî sîyasetmedarê cinîyî yê Ewropa xeylêk giranîye danê na mesele ser. Na babete de sîyasetmedaranê Ewropa MHPyî ra ber pêro partîyan reyde qisey kerd.''

Ozsoyî eşkera kerd ke MPKE bi zelalî vat ke ê vera polîtîkayanê tedayan ê hukmatê Tirkîya yê. Ozsoyî vat: ''Konseya Ewropa de derheqê Tirkîya de bi seyan birî estê. Seba ke vera Tirkîya ambargo bîyarê ca ê hê gêrenê firsendêkî. Nika dezgehê Konseya Ewropa persenê ke eke Tirkîya biranê înan nêana ca çira endama înan a. Beno ke wextê verê ma de eke Tirkîya gamêka pozîtîfe nêerza endamîya ci ya Konseya Ewropa do biba babeta nîqaşî.''