Hemsereka Kongreya Komelê Demokratîkî (KCD) û Wekîlê Partîya Çep a Keske Berdan Ozturkî ANFyî rê derheqê netîceyanê weçînayîşan de qisey kerd. 

Ozturkî bale ante ser ke tradîsyonê xoverdayîşî yê Kurdîstanî ser û îfade kerd ke weçînayîşî zî parçeyêkê nê tradîsyonî yê. Ozturkî vat: ''Weçînayîşî lingêkê têkoşînî yê û ma nê têkoşînî de nêeşkayî biresê armancê xo. Ma nêeşkayî bi xurtî şarî rê qala Partîya Çep a Keske bikerê xoka zaf rayê ma nêhesibîyayî. Xeylêk cayan de zî rayê ma dizîyayî û MHP yan zî HUDA-PARî rê nusîyayî. La reyna zî Kurdîstan de şarî vera rejîmê Erdoganî tewir mojna. Şarê kurdî mojna ke do rayîr nêdo Erdoganî. Îradeyêko winayên est o ke do hewnê rejîmê faşîstî biherimno.

Motîvasyon û rolê dîyarkerî yê kurdan muxalefet û îqtîdar tersna coka înan dişmenîya kurdan ser o karê weçînayîşî kerdî. Gefê qefilnayîşê HDPyî ra ma binê sîwana Partîya Çep a Keske de kewtî weçînayîşî. Proses de AKP-MHPyî îmkanê dewlete seferber kerdî, karê weçînayîşî kerdî, dormeyê buroyanê ma yê weçînayîşî ame girewtene. Weçînayîşî seke mabênê ma û dewlete de qewimîyayî. Rejîmê tekcamêrdî xîret kerd ke bi rayîrê dişmenîya kurdan faşîzmî mende bikero. La bi temsîlîya ma ya Meclîsî têkoşînê ma yê vera nê rejîmî do dewam bikero.''