Ozturkî bi munasebetê 1ê Teşrîna peyêne Roja Kobanê ya Dinya ANFyî rê qisey kerd û vat hêrişo ke hetê îqtîdarê sîyasîyî yê Tirkîye ra ameyo kerdene hemverê heme erc û rûmetê merdimayîye de yo. Ozturkî bale ante ke virazîyayîşê hêrişî dimayê Kombîyayîşê Çarhetî ra tesadufêk nêyo û vat ke pey beran de bazarîyî ameyê kerdene.  

DINYA XEYLÎ ÇÎYAN DEYNDARÊ KOBANÊ YA

Ozturkî dewamê qiseykerdişê xo de vat: “Kobanê hemverê çeteyanê DAÎŞî yo ke nameyê ci ra her kes tersayêne de mucadele kerd û rûmetê merdimayî xelesna. Kobanê de qic, pîl, ciwan û kokim her kes tewrê xoverdayîşî bi û DAÎŞî berteraf kerd.

Zihnîyetê nê hêzanê ke hêriş kerdo û yê çeteyanê DAÎŞî yew o. Çîyo ke verî ê çeteyan nêeşkayî bikerê nê hêzî wazenê ewro bikerê.”

KOMBÎYAYÎŞÎ RA DIMA VIRAZÎYAYÎŞÊ NÊ HÊRIŞÎ TESADUF NÊYO

Ozturkî ard ziwan tesaduf nêyo ke no hêriş Kombîyayîşê Çarhetî ra dima virazîyayo û vat: “Sebebo tekane yê cagirewtişê Fransa û Almanya nê kombîyayîşî pakkerdişê Idlibî ra dima girewtişê vernîya çeteyanê ke do koçê welatanê înan bikerê yo. Beno ke înan seva nê hêrişî rê bêveng mendê.”

Ozturkî vat ke fotografê Emmanuel Macron û Angela Merkele yê kombîyayîşî ramot ke înan rê prensîbî nê menfaatî muhîm ê.

AKP AMEYOXÊ ŞARANÊ TIRKÎYE TIRENO

Ozturkî ard vîrî ke Efrîn de zî heman senaryo estbi û vat: “AKP îhtîyacî bi şerêkê teberî vînena ke pê bieşko îqtîdarê xo yê faşîstî dewam bikero. Na yewe ra hêrişê Rojava kenê. Labelê bedelê nê zî ê nêdanê, şar bi krîzanê îqtîsadî û sîyasîyî bedel dano.

AKP seva ke kurdê ûcayî nêbê wayîrê statuyêk keweno Sûrîye. Seva nê zihnîyetî çeteyê cîhadperwerî tehluke nêyê, statuya kurdan tehluke ya. Seva ke kurdî nêbê wayîrê statu çi destê înan ra yeno kenê. ”

KOBANÊ DO BICIWÎYO

Ozturkî peynîya qiseykerdişê xo de 1ê Teşrîna peyêne  Roja Kobanê ya Dinya pîroz kerde û vat ke heta hemverê heme hêrişan de Kobanêya ke bîya sembolê seypêyî, azadî û demokrasî do biciwîyo.