Vera tecrîdê serê Rayberê Şarê Kurdî Abdullah Ocalanî nêrazîbîyayîşî zêdîyenê. Senatorê fransijî Pascal Savoldelliyî zî seba pêvînayîşê bi Rayberê Şarê Kurdî Abdullah Ocalanî muracatê Wezîrîya Edaletî ya Tirkîya kerdbi. Senatorî derheqê muracatê xo de ANFyî rê qisey kerd.

Savoldelliyî vist vîrî ke Rayberê Şarê Kurdî ra hîrê serrî yo xeberêke nêna girewtene û ey bi muracatê xo erkê xo yê însanîye kerdo. Savoldelliyî vat: ''Abdullah Ocalan tepişteyêko normal nîyo. Ey wextê prosesê çareserîye de rolêko dîyarker kay kerd. Ez bi tewirê dewlete yê vera Abdullah Ocalanî hêrsbîyaye ya. Ganî keye, avûkat û merdimê ey rewşa Ocalanî ra xeberdar bibê. Hetê bînî ra tecrîdê Îmraliyî pêro peymananê mîyanneteweyîyan binpay keno. Tirkîya goreyê peymanan tênêgêrena.''

Savoldelliyî bale ante ser ke dezgehê Ewropa yê sey Komîteya Vergirewtişê Îşkenceyî (CPT) verê tecrîdî de bêveng ê û vat: ''Ganî ma verê dezgehanê Ewropa de çalakîyan bikerê. Mi xeylê parlamenter û senatoran rê nuşt û nînan ra waşt ke bi nê hawayî nêzdîyê nê dezgehan bibê. Goreyê krîteranê Konseya Ewropa û Peymana Heqanê Merdiman a Ewropa Tirkîya cewabê ma bida. Tirkîya nê krîterî qebul kerdê. La dezgehê Ewropa Tirkîya rê vengê xo nêkenê.''

Savoldelliyî pê hesna ke Wezîrîya Edaletî hema zî cewab nêdayo muracatê ci û vat: ''Ez pabeyê cewabê înan a. Cewabnêdayîş parçeyê ferasetê xirabî yo. Seba ke çareserîyêke bivînê ma rewşa Abdullah Ocalanî ser de vindenê. Ewro pênaseyê terorîstî texrîb bîyo. Kurdê ke haştîye wazenê ganî sey terorîstî nêrê pênasekerdene. Coka ez seba Abdullah Ocalanî zî vana 'haştîwaz.' Tirkîya Peymana Heqanê Merdiman a Ewropa îmza kerda la rixmê ney zî heqanê Ocalanî binpay kena.

Eke şima muxalîfan erzenê zîndanî o çax nêeşkenê demokrasî ra behs bikerê. Goreyê mi Erdogan bi înkarkerdişê kurdan wazeno muxalefetî zî werte ra wedarno. Eke şima heqanê şarêkê bînî çin hesibnenê o çax terorîzmê raştikênî şima kenê.''

Savoldelliyî bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û vat: ''Abdullah Ocalan îradeyê xo û ruhê xo yê têkoşînî seba çareserîya sîyasîye îsbat kerdî. La o zîndanêk de ameyo bêvengkerdene. No merdimo ke qalê haştîye keno ganî azad bibo ke ancî rolê xo kay bikero. Dewleta tirke çita ra tersena?''