Panc tepişteyê Zîndanê Tîpê T’yî yê Amedî ke 5’ê Çele ra grevê vêşanîye de yê, xo sey “vazdayoxê rayîrê dergî” name kenê. Her panc xoverdayoxan mektûbêko hempar şirawit û seba çalakîya xo vat, “her çî resimê kêfweşî û rindekîya ma yo” û ard ziwan ke do çalakîya xo bi qerardarî bidomnê.

Firat Ertûnç, Mazlûm Dîlek, Farûk Akray, Recep Bal û Adnan Yîgîttekîn ê tepişteyan ra yê ke seba qedînayîşê tecrîdkerdişê Rayberê Şarê Kurdî Abdullah Ocalanî tewrê grevê vêşanîye yo ke bi serkêşîya hemsereka KCD’yî Leyla Guvene bica yeno bîyê.

BIRAYÊ ERTÛNÇÎ HEME TEPIŞTE YÊ

Firat Ertûnço ke 5’ê Çele ra Zîndanê Tîpê T’yî yê Amedî de grevê vêşanîye de yo, serra 1987 de Colemêrg de ame dinya. Serra 2009’î ra heta 2014 zîndan de mend. Dimayo ke ame veradayene mîyanê DBP’yî de dest bi sîyasetî kerd. Gama ke şerî newe ra dest pêkerd, bi mazereto ke eşkerakerdişê xoîdarekerdişê serra 2015’î de ca girewto, ancî ame tepiştene û 16 serrî cezaya zîndanî dîyaye ê. Ertûnçî panc bira yê û heme zî zîndananê Tirkîya de tepişte yê.

EMRÊ DOMANÎYE DE AME TEPIŞTENE

Mazlûm Dîlek serra 1990 de qezaya Kerboranî ya Mêrdînî de ame dinya. Serra 2007 de hewna ke 17 serre bi ame tepiştene û cezaya tepiştişî ya heta bi hetayî ci rê dîyaye. Seba ke gama ame tepiştene emrê ci qijkek bi, cezaya ê amî kemîkerdene. 12 serrî yo zîndan de yo û halo normal de ganî dimayê 4 serran bêro veradayene.  

17 SERRÎ MÎYANÊ SEFANÊ MUCADELEYÎ DE MEND

Farûk Akray serra 1974 de qezaya Tetwanî ya Bedlîsî de ame dinya. Gama ke Têgêrayîşê Azadîye ya Kurdan nas kerd hewna 16 serre bi û 17 serrî xo de kewt mîyanê sefanê mucadeleyî. Dimayê 17 serran ame tepiştene û cezaya heta bi hetayî ci rê dîyaye. 11 serrî yo tepişte yo û hewna 19 serrê ci yê bînî estê ke cezaya ci biqedîyo.

VERÊ 10 SERRAN AME TEPIŞTENE

Recep Bal serra 1984 de qezaya Elkê yê Şirnexî de ame dinya. Serra 2004 de tewrê sefanê Têgêrayîşê Azadîye ya Kurdan bi, dimayê 5 serran ame tepiştene. 25 serrî cezaya zîndanî Balî rê dîyaye. 10 serrî yo ke zîndan de yo.

SERRA 2012 DE ZÎ TEWRÊ CI BIBI

Adnan Yîgîttekîn serra 1992 de dewa Şemsê ya Sêrtî de ame dinya. Serra 2010 de tewrê mucadeleyî bi û dimayê serrêk ame tepiştene. 70 serrî ceza dîyaye ci. 8 serrî yo ke zîndan de yo. 12’ê Êlule 2012 de koma hîrêyine de tewrê grevê vêşanîye bibi. Birayêkê Yîgîttekînî mîyanê sefanê gerîlayan de yo.

VAZDAYOXÊ RAYÎRÊ DERGÎ

Her panc tepişteyan mektûbê xo yê hemparî de vanê, “Ma panc vazdayoxê rayîrê dergî yê.”  

PROSESO KE MERDIMAN KENO RINDEK

Mektûbê her panc xoverdayoxanê grevê vêşanîye wina dewam keno: “Çi bêro kerdene, seba ci çi bêro fedakerdene zî na raywanîye de do kemî bimano. Eke ma do bieşkê deynê xo kemî zî bide Rojê xo û êyê ke bîyî estareyî, no yew do seba ma kêfweşî bo. Rojê ma yê 30’î resimê kêfweşîya ma yê. Nê rojî, no proses her hetî ra merdiman kena rindek. Berîtane seba bîrênêka serê rîyê aye ya ke şerêk de virazîyabî vatibi, ‘Resimê rindekîya min o.’ Pîr Kemalî bi vateyê ‘çi weş o’ 14’ê Temmuze silam kerdibi. Doctor Hayrî Dûrmûşî vi vateyê ‘Deyndarê şarê xo bi’ xatir waştibi.”

 ‘RESIMÊ RINDEKÎYA MA YO’

Ma zî wayîrê heman hîsî yê. Eke ma hîsanê xo bi cumleyêk bîyarê ziwan, ma do zî vajê, ‘No yew resimê kêfweşî û rindekîya ma yo.’

ROJÊ WEŞÎ VERNÎYA MA DE YÊ

Hemrayê erjayeyî, peynîya na raywanîye de rojê weşî estê ke bendeyê ma yê. Bajar de merdimanê ke vatêne ‘netîce do bêhempa bo,’ ma bi nê hîsî ciwîyenê. Ma her roje boya merdimê ke azad benê zerrîya xo de hîs kenê. Ma ê vengê bicoşî yo ke tim mijdana serkewtişî dano şinawenê, ke vanê ‘Ma bi ser kewtî, do şima zî bi ser bikewê.’

Bi nê vîr û bawerîye, ma şima, şarê xo, Rojê ma û her ferdê Têgêrayîşê Azadîye, heme hemrayanê xo bi heskerdiş û hurmetî silam kenê.