Paytextê Fransa Paris de 23ê kanûne de vera Merkezê Kulturê Kurdan ê Ahmet Kayayî hêrişo çekdar ame kerdene. Sîyasetmedara kurde  Evîne Botan (Emine Kara), Hunermend Mîr Perwer û welatperwer Abdurrahman Kizil hêrişî de şehîd bîyî.

Kiştox William Mallet bi sûcê 'hêrişê nîjadperestî' tepişîya. Kurdî û xelêk partî û dezgehê komelê sîvîlî vanê no cînayeto edlî nîyo û wazenê ke sey cînayetê sîyasîyî hetê dozgerîya antî-terorî ra wa cipersayîş bêro rayraberdene.

Bi waştişê roşnîkerdişê raştîyan û waştişê edaletî ewro meydanê Opera ke nêzdîyê  Wezîrîya Edaletî de yo de çalakîya edaletî ameye kerdene. Çalakîye de ame waştene ke wa qirkerdişê 23ê kanûse sey hêrişê terorîst û sîyasîyî bêro pênaskerdene.

Berîvane Firata ke bi nameyê Konseya Demokratîke ya Kurdan a Fransa qisey kerd, vist vîrî ke badê des serran reyna binateyê Paris de hîrê kurdî ameyî qetilkerdene û vat: ''Kişta ma de Wezîrîya Edaletî est a. Des serrî cuwa ver embazê ma Sara, Rojbîne û Ronahî ameyî qetilkerdene. Ma tim û tim vat heta ke şima nê qirkerdişî safî mekerê kurdî nînê pawitene.  Inkey hêna kurdî ameyî qetilkerdene. Inkey ma ra vanê no hêrişêko nîjadperest o. La ma zaf hole zanê ke no hêrişêko terorîst o û kurdî ameyî hedefgirewtene.''

Hunermendê kurdan zî pê enstrumananê xo tewrê çalakîye bîyî û deyîrî vatî. Hunermendan semedê tewrbîyayîşê çalakîya roja pancşemeyî ke do verê Wezîrîya Kulturî ya Fransa de bêro kerdene, veng da.