Paytexê Fransa Paris de vera Merkezê Kulturê Kurdan  hêrişo çekdar ame kerdene, şehîd û birîndarî est ê.

Goreyê zanayîşanê ke ameyî girewtene komela ke Taxa Strasbourg Saint Denisî de ya ratşê hêrişî ameye. Goreyê şahîdan kesêko pê otomobîle ke ame kuçeyê komele guleyî kerdî komele ser ra. Hêrişkarê eynî kuçe de hêrişê yew restorantê kurdan û koaforî zî kerd.

Goreyê bîlançoya newîye ya ke çimeyanê polîsan û nêweşxaneyî ra ameye girewtene  hîrê kesî şehîd bîyî û hîrê kesî birîndar bîyî. Polîsan da zanayene ke hêrişkar ameyo destbendkerdene la nasnameyê ci eşkera nêkerd. Badê hêrişê kurdan verê xo da verê komele. Çemberê polîsan dormeyê komele de dewam keno.

Wezîrê Karanê Zereyî yê Fransa Gerald Darmaninî ke qereqolê Tourcoingî zîyaret kerd hesabê xo twiterî ra eşkera kerd ke  do şiro warê qewimîyayîşî.