Wekîlê Partîya Çep a Keske yê Colemêrgî Vezîr Parlakî derheqê tecrîdê Îmraliuî, krîzê ekonomîkî, xebatanê Partîya Çep a Keske û HDPyî de ANFyî rê qisey kerd.

Vezîr Parlakî pare kerd ke seba ke welat bi xirabî îdare beno çimeyê ekonomîkî destê tay kesan de yê. Parlakî da zanayene ke dewlete seba ke sere de kurdan pêro muxalîfan krîmînalîze kena sermaye nêkewena welatî û budçeyêka hîra zî dîyena şerî. 

Parlakî îfade kerd ke rixmê polîtîkayanê teda zî se ra 48ê merdiman mojna ke ê tewirê antîdemokratîkî û hêrişan qebul nêkenê û vat: ''Rayê ke îqtîdarî vistî destî nîşaneya binkewtişêkê pîlî ya. Kurdan sindoqan de vera polîtîkaya înkar û îmha ya îqtîdarî nêrazîbîyayîşê xo mojna. Hêrişê vera kurdan plankerde yê.

Ganî teyna bi bernameyê weçînayîşan ney bi bernameyanê hîrayan ma vera nê hêrişan têkoşîn bikerê. Prosesê verê ma de, ma do şarî reyde hîna zaf bêrê têhet, pîya nîqaşan bikerê, yew bernameyî birazê û têkoşînê xo dîyar bikerê. Ma do rêxistinanê demokratîkan, hunermend, roşnvîr, rojnameger, akademîsyenan, dewan, taxan û şaristanan ra bigêrêi kombîyayîşanê x bikerê. Rexne û pêşnîyazanê şarê xo ser o ma do şikl bidê têkoşînê xo.''

Parlakî dîyar kerd ke polîtîkaya tecrîdî bêhuqûqî ya û ganî na bêhuqûqîye bêra dîyene. Parlakî vat: ''tecrîdê vera Rayberê Şarê Kurdî Abdullah Ocalanî armanc keno ke tesîrê ê keso ke eşkeno Rojhelatê Mîyanênî de haştîye virazo, asteng bikero. Bi tecrîdê Îmraliyî yeno waştene ke mesaj bêro dayene şarê ma û tepişteyan.''