Martîna Andersone zîyaret de wina va: “Ma bi nameyê Sînn Feînî, bi berpirsîyarîye têgêrenê, wazenê ke wa problemê Kurdan çareser bibo.“

Andersone qiseykerdişê xo de bale ante ser ke, bi nameyê grûba çepa yewbîyayîye ya Ewropa (GUE/ENGL) nê babetî, xeylî dolimi ardê rojdemê  parlamentoyê Ewropa û va ma do no derheq de hîna zêde tê bigerê û wina dewam kerd: Ez bi xo Îrlanda ra ya û nê grevanê vêşanîye baş fehm kena. Serra 1981 de, ma 10 hevalê xo, grevê vêşanîye de kerdî vîndî. Hetê bînî ra, ma mucadeleyê haştîye zî baş zanê. Ez bi xo zî girewte bîya. Michael Rogan o ke mi het de yo zî girewteyo verên o. Ez hîrês û nêm serre hepisxane de menda.“

PARLAMENTOYÊ EWROPA DE TAYÊ HÊZÊ DIRÎYÎNÎ ESTÊ

Parlamentera partîya karkerî  ya Îngilîstanî Julîe Warde zî bale ante ser ke ê derheqê Ocalan û problemê Kurdan de cehd kenê. Warde derheqê rewşa Leyla Guvene de zî qisey kerd û va cinîyê Kurdî xurtê û nê hêzê xo zî Ocalanî ra gênê.

Warde bale ante parlamentoyê Ewropa ser û derheqê tayê hêzê ke bi dirîtîye têgêrenê û Tirkîya de bi hewayêko menfaatî têkilîyê xo estê de wina va: “ Çi heyf ke dormeyê parlamentoyî hetê kesanê dirîyînan ra ameyo girewtene.Nêverdanê ma şime Tirkîya ser. Ê bi xo zî baş zana Tirkîya welatêko ewlehî nîyo, la xeylî babetanê sey peymana mihaciran, nêwazenê şorê ser.“

Bi nameyê çalakwanan zî Mustafa Sarikayayî zî seba zîyaret û paştdarîye, parlamenteran rê spas kerd û va:‘‘ Komploya mîyanneteweyî û tecrîdî de bêçika sazîyanê Ewropa zî esta. Înan ke Ocalan teslîmê Tirkîya kerdo, sîstemê Îmralîyî zî awan kerdo.“

Xoverdayoxan ra Gulîstan Îke zî qiseykerdişêk kerd û va paştdarîya dostanê Kurdan eşkera ya, la nêvejena. Îke waşt ke CPT bikewo dewre û parlamentoyê Ewropa û Konseya Ewropa hîna zêdê tê bigêro.

Reyna xoverdayoxan ra Kardo Bokanîyî zî va: “Xeylî kesî hepisxaneyan de yê û reyna hepisxaneyan de xeylî kesî grevê vêşanîye de yê. Azadbîyayîşê girewteyan û qedênayîşê grevanê vêşanîye destê parlamentoyê Ewropa û komelê mîyanneteweyî de yo. Goreyê peymananê Ewropa û neteweyanê yewbîyayîyan ê ke hetê Tirkîya ra zî ameyê qebûlkerdene, her girewte ganî hewte de yew saete pêvînayîş bikero. Heta ke talebê ma yê Ocalanî nêrê ca, çalakîya ma do dewam bikero.“