Parlamenterê ke do bi wesîleyê roniştişanê Strasboûrgî yê Parlamentoyê Ewropa (PE) meseleyê tecrîdî zî bîyarê rojdem, saetanê şanî de şîyî serdana xoverdayoxanê grevê vêşanîye yê ke hemverê tecrîdê serê Ocalanî de kewtê grevê vêşanîye.

Cinîyan ê Alman û Kurdan zî parlamenteran rê embazîye kerde, înan çalakwanê ke rîyê grevê vêşanîye ra mecbûr ê cayî ser o bê cayê înan de zîyaret kerdî.  

'MA ZÎ PERÇEYÊKÊ NÊ MUCADELEYÎ YÊ'

Tîya parlamentera Swêdije û endama Partîya Çepî ya Swêdî (Vänsterpartiet) Malîn Bjorke qisey kerd û seba ke ê çalakîya xo seba aşitî, demokrasî û heqanê merdiman virazenê çalakwanan rê spas kerd.  Bjorke ard ziwan ke ê zî perçeyêkê nê mucadeleyî yê, ê paştîdayîşê xoverdayîşî ra wetêr, ê bi xo zî zereyê nê mucadeleyî de yê.  Bjorke vat ke şikitişê tecrîdî amacê înan o hempar o.

FORENZA: MA DO CPT'YÎ DIR QISEY BIKERÊ

Parlamenteran ra Eleonora Forenza zî ard ziwan ke do ewro PE de di kombîyayîşî bêrê viraştene ke înan ra yew do hetê cinîyan ra bêro viraştene û ê do meseleyî ûca bîyarê rojdem.  Forenza, heman wextî de vat ke ê do ewro Komîteya Vernîgirewtişê Îşkenceyî reyde pêvînayîş virazê û dosyayêk bidê înan, waştişanê çalakwanan bîyarê ziwan.

Forenza ard ziwan ke a sey sîyasetkarêk ra vêşêr wazena ke sey cinîyêk paştîdayîşê xo ramojno û vat xoverdayîşo ke seba wedaritişê tecrîdê serê Rayberê Şarê Kurdî yeno kerdene Îtalya de zî ci rê destekêko pîl esto. Forenza vat ke rejimê Erdoganî bi tecrîdî bi hawayêkê eşkerayî heqanê merdiman binpay keno û vat, "Eke kesêk bi nê amacan bedenê xo dano verê vêşanîye no zaf manîdar o û ercaye yo."

'CINÎYA KURDE DINYA RÊ BÎYE NIMÛNEYE'

Forenzaya ke pêvînayîşê çalakwanan ê cinîyan de qisey kerd vat ke aye derheqê mucadeleyê cinîyan ê Kurdan de xeylî çîyî wendê. Forenza mucadeleyê Konfederalîzmo Demokratîk û seypêyîya cinî-camêrdî silam kerdî û bale ante ke mucadeleyê cinîyan ê Kurdan hemeyê dinya rê bîyo nimûne.  Forenza vat ke aye qiseykerdişê xo yê PE yê vizêrênî de bale ante xoverdayîşê Leyla Guvene ser.

Yuksel Koço ke parlamenteran rê spas kerd ard ziwan ke înan heta ewro 3 reyî CPT'yî dir pêvînayîş viraşto, labelê heta ewro CPT'yî sey sazî gureyê xo nêardo ca.

ÎKE: TECRÎD TENA BI OCALANÎ BISÎNOR NÊYO

Xoverdayoxan ê cinîyan zî ard ziwan ke mucadeleyê înan heman wextî de seba qedînayîşê tecrîdî yo ke 20 serrî yo dewam keno yeno dayene. Çalakwanan ra Gulistan Îke ya ke parlamenteran dir qisey kerd, ard ziwan ke sîstemê tecrîdî tena bi Ocalanî bisînor nêyo.

Îke ard ziwan ke Tirkîya de kîşta şaran û muxalefetî de hemverê cinîyan de rejimê tecrîdî yeno bicaardene û vat ke hêrişê hemverê Rojawan û Başûrê Kurdistanî û heme hêrişê îmhakerdişî tecrîdî dir eleqedar ê. Îkeye vat no xoverdayîşo ke bi serkêşîya Leyla Guvene ameyo destpêkerdene ê zî tewrê ci bîyê û no hemverê bicaardişanê antî-demokratîkan de tewirêk o.

'MA SERFIRAZÎYE RA BAWER KENÊ'

Îkeye sere de yê cinîyan hemeyê şaranê Ewropa ra paştîdayîş waşt û ard vîrî ke muxatebê nê meseleyî KE û CPT yê. Îkeye peynî de vat ke ê serfirazîye ra bawer kenê û no mucadeleyê înan seba azanê ameyoxan o zî.

MARÎE-PÎERRE VÎEU ZÎ ÇALAKWANÎ ZÎYARET KERDÎ

Hetê bînî ra endama PE û parlamentera Fransize Marîe-Pîerre Vîeu zî mîyanê roje de qey wextêkê kilmekî çalakwanî zîyaret kerdî.

Ame zanayene ke do Eleonora Forenze bi xo ewro nezdê Komîteya Vernîgirewtişê Îşkenceyî (CPT) de teşebusan bikero û dosya bido înan.