Endama Meclîsê Federalî ya Almanya Gokay Akbuluta ke şî serdana çalakîya grevê vêşanîye ya ke seba wedartişê tecrîdê serê Ocalanî Strasbourg de ameya destpêkerdene vat tecrîd bêhuqûqî yo û ganî îxracatê sîlehan ê seba Tirkîya bêro vindarnayene. Akbulute vat ganî Yewîya Ewropa (YE) û Almanya hemverê polîtîkayanê Tirkîya de tewir bigîrê.

 ‘DO MECLÎSÊ FEDERALÎ DE HEMVERÊ GEFÊ ÎŞXALÎ CEHDÊ MA BIBÊ’

Akbulute cayê çalakîye de vat ê sey Die Linke paştî danê heme waştişanê çalakwanan û ganî tecrîd tavilî bêro wedartene. Akbulutî heman wextî vat ke ê paştî danê hemsereka KCDyî û parlamentera HDPyî Leyla Guvena ke çalakîya ci kewta roja xo ya 54ine.

Derheqê meseleyê Rojava de zî Akbulute nê vatî: “Meclîsê Almanya de heme grûbanê partîyan îşxalê Efrînî şermezar kerd. Tena serekwezîre Merkele şermezar nêkerd. Ma do abîyayîşê parlamento de reyna pêşnîyarîyanê xo biyarê ziwan. Ma do zereyê parlamento de û teberê ci de paştî bidê mucadeleyê şarê Kurdî.”  

TECRÎD HEMVERÊ PEYMANAN DE YO; GANÎ TAVILÎ BÊRO WEDARTENE

Akbulute vat Almanya hewna zî cayê ke şer tede esto ê cayan rê sîlehan şirawena û sey Die Linke ê wazenê sere de Rheinmetall heme şîrketê sîlehan rotişê sîlehan vindarnê û nê vatî: “Ma no Efrîn de zî dî, bi tankanê Almanan înan hêriş kerd. Nê prosesê dîktatoryalî yê Tirkîya de ganî muzakereyê ci yê Yewîya Ewropa cade bêrê vindarnayene. Tirkîya hetêk ra cîhadîstan weyî kena hetêna ra Yewîya Ewropa seba multecîyan Tirkîya dir hemparî kena. Ma sey Partîya Çepe wazenê tavilî nê peymanî bêrê vindarnayene.

Ganî no tecrîd zî tavilî bêro wedartene. Tecrîd îşkenceyêk o. Çi goreyê krîteranê CPT, çi goreyê Parlamentoya Ewropa û çi Neteweyê Yewbîyayeyî nê peymanan de cayê tecrîdî çinyo.”