Grevê vêşanîye yê Cemal Kobanê, Omer Bagdûr, Mele Mûstafa Tûzak û Şîyar Xelîlî dewam keno. Tûzak 112 rojî, Xelîl 99 rojî, Kobanê û Bagdûr zî 96 rojî yo ke grevê vêşanîye de yê.

Parlamenterê Partîya Çepe yê Eyaletê Berlînî Hakan Taş şi serdana grevê vêşanîye.

Taş: Waştişê Şima Waştişê Ma yê

Taşî vat, waştişê çalakwananê grevê vêşanîye waştişê înan ê û vat, “Xoverdayîş zî xoverdayîşê ma yo. La çi heyf ke hem hukmatê Almanya û hem zî yê Ewropa veng nêbenê xo. Xora seke yeno zanayene hukmatê Tirkî heme muracatan red keno.”

Taşî vat ke rizmê bêvengîya hukmatî zî do tecrîdê serê Rayberê Şarê Kurdî Abdullah Ocalanî bêro şikitene û vat, “Şima do xoverdayîşê xo bidomnê, ma do zî bibê vengê şima. Verê her çîyî ez seba nê xoverdayîşî vana ke keyeyê şima awan bo. Bi nê xoverdayîşî ez umîd kena ke do tecrîd bişikîyo.”

Çalakwananê grevê vêşanîye zî waştişê xo yê ganweşîya Taşî ardî ziwan û vat ke waştişê înan waştişê merdimîye yê. Bi nameyê çalakwanan Omer Bagdûrî qisey kerd û vat, “Kesê ke qasê serê derzîne ercê merdimîye înan dir mendo do paştî bido nê çalakîyan. Ma bawer kenê ke qetîyen do çalakîya ma netîce bigêro, seba naye zî ganî her kes nê xoverdayîşî rê wayîr vecîyo.”

Hetêna ra seba serrgêra 82’ine ya qirkerdişê Dêrsimî verê sefaretê Tirkî yê Berlînî de çalakîya şermezarkerdişî bi organîzasyonê Însîyatîfê Azadîya Dêrsimî ameye viraştene. Protestokerdişê qirkerdişanê dewleta Tirkî ra dima çalakwanî şîyî serdana grevê vêşanîye.