Parlamenterê Partîya Çepe Michel Brandtî par gama ke Erdogan şibi serdana Berlînî beyraqa YPG’yî buroyê xo de daliqnabî, la polîsan eştbi serê buroyî. Brandtî derheqê ê qewimîyayîşî de muracatê Mehkemeya Destûrê Bingeyênî ya Federale kerd.
Serekkomaro Tirk Recep Tayyîp Erdogan Êlula ravêrteye de amebi Berlîn û dest bi dayîş-girewtişan kerdibi. Endamê Meclîsê Federalî yê Partîya Çepe Michel Brandtî seba hemkarîya hukmatê federalî yê serekîya Merkele ya bi rejîmê Enqereyî şermezar bikero û paştî bido Rojawanî, her hîrê pacayanê buroyê xo de ke nizdê otela ke Erdogan tede mendêne bi, beyraqa YPG’yî daliqnabî.
Polîsan wextêk ra dima bê ke xebere bidê Brandtî û selahîyetdaranê Partîya Çepe ê Meclîsê Federalî, reyêk de eşt serê buroyî û dest da serê beyraqanê YPG’yî. Koma Partîya Çepe muracatê Serekê Meclîsê Federalî Wolfgang Schaeubleî dabi û fikrê ci persabi.
Serekê Meclîsî Paştî Dabî Polîsan
Schaeubleyo ke partîya Yewîya Demokratanê Xiristîyanan (CDU) ra yo zî paştî dabî polîsan û vatibi, “Ters û qesawet estbi ke hetkarê Erdoganî yê ke nê bivînê hêrişê Meclîsê Federalî bikerê, naye ra beyraqî ameyî warardene.”
Seba ke Meclîso Federal bi bêxemî nizdê mesela bi, parlamenterê Partîya Çepe Michel Brandtî muracatê Mehkemeya Destûrê Bingeyênî ya Federale kerd. Brandtî vat hemverê qanûnî de yo ke polîsî bê hayîya ci bikewê buroyê ê. Mehkemeya Destûrê Bingeyênî ya Federale zî muracat qebûl kerd û yeno pawitene rojanê ameyoxan de qerarê xo bido.
