Koordînasyonê Amedî yê Partîya Çep a Keske buroyê xo de derheqê turê diyînî yê weçînayîşanê serekkomarîye de kombîyayîşêk kerd.

Wekîlê Partîya Çep a Keske yê Amedî Ceylane Akça û Serhat Eren, hemvervatoxê partîye yê Amedî û hemserekê HDP û DBPyî yê Amedî zî tewrê kombîyayîşî bîyî.

Hemserekê HDPyî yê Amedî Zeyat Ceylanî kombîyayîş de pare kerd ke kurdan nêverda ke Erdogan turê yewinî de ser bikewo û ganî 28ê gulane de turê diyînî de zî kurdî serkewtişê Erdoganî rê rayîr nêdê. Ceylanî vat: ''Ma 28ê gulane de şorê sindoqan ser, wayîrê sindoqan vejîyê û seba binvistişê rejîmê tekcamêrdî raya xo bidê.''

Wekîle Ceylane Akça zî îfade kerd ke ê do nêverdê ke Erdogan bibo serekkomar û vat: ''Wa şarê ma ça de beno wa bibo şoro raya xo bido. Vizêr ciwanê ke govende girewtêne raştê îşkenceyî ameyî. Seba ke ma cewab bidê nê hêrişan şorê sindoqan.''