Warê mîyanneteweyî de vera operasyonanê qirkerdişê sîyasî yê serê HDPyî  nêrazîbîyayîşî dewam kenê. Partîya Çepe ya Ewropa û Partîya Herikîyayîşê Şarî ya Tunusî zî operasyonê vera HDPyî şermezar kerd û paştî daye HDP. 

Serekê Partîya Çepe ya Ewropa Heinz Bierbaum derheqê babete de eşkerayîye daye û venga Yewîya Ewropa da ke vera operasyonan têbigêra.

Bierbaumî vat: ''Erdogan muxalefetî rê teda keno. Prosesê Koroma de zî tedaya Erdoganî dewam keno. Ma nê destbendkerdişan û destsernayîşê wezîfeyan bi pîtî şermezar kenê. Yewîya Ewropa ganî cade nêrazîbîyayîşê xo bimojna Tirkîya û biwaza ke Tirkîya tepişteyanê sîyasîyan vera bida.

Çar parçeyanê Kurdîstanî ra zî 15 partîyê sîyasî, înîsîyatîf û rêxistinê sîyasîyî yê kurdan Hewlêr de kom bîyî û înan hêrişê vera HDPyî ercnayî. Partîya Kedkare ya Kurdîstanî, Partîya Komunîste ya Kurdîstanî, Partîya Yewîya Demokrate ya Kurdîstanî, Partîya Yewîya Demokrate ya Kurdan a Sûrîye, Partîya Azadîye ya Kurdîstanî, Partîya Lîberale ya Kurdîstanî, KNK, Têgêrayîşê Şarî yê Demokratî yê Kurdîstanî, Partîya Komare ya Kurdîstanî, Partîya Xelisnayîşî, Têgêrayîşê Xelisîyayîşî yê Demokratîkî yê Kurdîstanî, Partîya Demokrate ya Kurdîstanî ya Îranî û Partîya Pawitiê Kurdîstanî pîya eşkerayîyêka hempare daye.

Nameyê partîyan ser o Bêkes Heme Qadirî eşkerayîye wende û vat: ''Ma venga komelê mîyanneteweyîyî danê ke vera destbendkerdişanê HDPyîjan ganî cade têbigêro. Ganî nê hêrişî bêrê vindarnayene. Ma do tewirê AKPyî şermezar bikerê.''

Partîya Herikîyayîşê Şarî ya Tunusî zî bi eşkerayîyêke hêrişî şermezar kerdî û vat: ''Ma pê bawer ê ke embazê ma yê HDPyîjî têkoşînê xo yê azadî, demokrasî, huqûq û komelkî de do ser bikewê. Eşkera yo ke şîdeto faşîst do çin bibo. Ganî destbendkerdeyî cade bêrê veradayene.''