Derheqê Selahattîn Demîrtaşî de bi îdîaya ke pê Ahmet Davutogluyî heqaret kerd dewayêke amebî akerdene. Roniştişê dewa Mehkemeya Cezaya Aslî ya Îstanbulî de ame kerdene. Rêxistina HDPyî ya Îstanbulî roniştişî ra verî verê Edlîyeyê Çaglayanî yê Îstanbulî de eşkerayîyêke daye.

Eşkerayîye de pankarta 'Bira Mehkemeya Heqanê Merdiman a Ewropa (MHME) bîyarê ca' ameye akerdene. Hemsereka HDPyî ya Îstanbulî Elîfe Bulut pare kerd ke îqtîdar qanûnan binpay keno û biran nêano ca.

Hemserekê Partîya Sosyalîste ya Bindestan (ESP) Şahîn Tumukluyî zî ard ziwan ke rixmê biran ê huqûqîyan zî embazê înan vera nêdîyenê û îfade kerd ke ê do têkoşînê yewbîyayeyî rêxistin bikerê.

Hemsereka DBPyî Salîha Aydenîz bale ante girîngîya têkoşînê hemparî ser û vat: ''Seba azadîya Kurdîstanî û demokratîkbîyayîşê Tirkîya ma do têkoşînê xo dewam bikerê. Ma ewro seba têdûştî, edalet û haştîye tîya de yê.''

Hemvervatoxa HDKyî Îdîle Ugurlu vat: ''Îqtîdar hînî teşhîr bîyo. Eşkera bi ke birê înan huqûqî nê, sîyasî yê.''

Wekîla HDPyî ya Îstanbulî Zuleyha Gulum vat: ''Eke şima morê xo dayo binê peymana mîyanneteweyî ganî şima biranê ci zî bîyarê ca.''