Tirkîya de şewatî dewam kenê. Nê şewatê ke mesuldarîya ci erzîyaye milê kurdan hêrişanê nîjadperestan ê vera kurdan pîl kenê. 

Zîndanê Xarpêtî de tepişteyî pê bahaneya 'şewatê daristanan' benê hedefê îşkence û şîdetî. Tepişteyê bi nameyê Baran Bariş Korkmazî roja dişemeyî keyeyê xo reyde qisey kerd, cayê morî yê bedenê xo mojnayî û da zanayene ke pê bahaneya 'şewatê daristanan' înan rê îşkence ame kerdene.

Korkmazî nê agahîyî dayî: ''Gardîyanî pê bahaneya şewatî ma rê îşkence kenê. Gardîyanan wexto ke embazêkê ma yo nêweş berdêne revîr vat 'înan adir vist daristanan' û ci rê îşkence kerdo.Coka bedenê embazê ma mor û malyes bi. Gardîyanan heman roje pê heman banaha embazêkê ma yê bînî rê îşkence kerd û mi ra waşt ke ez înan reyde şora. Wexto ke mi qebul nêkerd înan da mi ro. Cuya mi binê asayîşî de nîya. Rewşa weşîye ya embazanê mi xirab a.''