Parlamentera çepe û sereka Grûba Dostîya Kurdan Marie-Christine Vergiate, parlamentero Qibrisij Takis Hadjigeorgiou û sereko rûmetkî yê Partîya Şaran a Demokratîke (HDP) û parlamenterê Îzmîrî yo verên Ertugrul Kurkçu tewrê kombîyayîşê çapemenîye yê Parlamentoya Ewropa bî.

BALE ANCÎYA TECRÎDÊ SERÊ OCALANÎ Û GREVANÊ VÊŞANÎYE

Marie-Christine Vergiate û Takis Hadjigeorgiouyî kombîyayîşê çapemenîye yê banê PE de qisey kerd û derheqê grevanê vêşanîye yê ke xeylî zîndanan de û Tirkîye, Kurdistan û Ewropa de seba protestokerdişê tecrîdê serê rayberê şarê Kurdî Abdullah Ocalanî ameyê destpêkerdene hayîdarîyî dayî.

Kombîyayîş de bale ancîya serê dewamkerdişê tepişîyayîşê hemserekê HDPyî yo verên Selahattîn Demîrtaşî û ame waştene ke nê meseleyî ser o bi hesasîyet bêro vindertene. PE ra ame waştene ke meseleyê grevê vêşanîye de ke hetê Leyla Guvene ra ameyo destpêkerdene zî hîna eleqedar bibo. Parlamenteran ard ziwan ke grevê vêşanîye netîceyê tecrîdî yê û seba aşitî ganî herinda tecrîdî de dîyalog bêro tercîhkerdene.    

KURKÇU: BI HAWAYÊKÊ KÊFÎYÎ BI TERORÎZM YENÊ SÛCDARKERDENE

Sereko rûmetkî yê Partîya Şaran a Demokratîke (HDP) û parlamenterê Îzmîrî yo verên Ertugrul Kurkçuyî zî vat ke hukmatê Tirkî bi hawayêkê kêfîyî derheqê muxalefetî de sûcdarîya terorîzmî keno. Kurkçîyî derheqê grevanê vêşanîyan ê zîndanan û yê şarê teberî de zî qisey kerd û ard ziwan ke amacê nê grevan wedartişê tecrîdê serê rayberê şarê Kurdî Abdullah Ocalanî yo.

Kurkçîyî grevê vêşanîye yê parlamentera Colemêrgî Leyla Guvene ke roja xo ya 35. peyde verdaye ard vîrî û vat ke seba wedartîşê tecrîdê serê Ocalanî aye wucûdê xo dayo vêşanîye ser. Kurkçîyî heman wextî de da zanayene ke dimayê qerarê MHME ra bilez Selahattîn Demîrtaşî rê cezaya zîndanî amîya dayene.