PE de faktorê Kurdî û zextê Tirkîye yenê munaqeşekerdene

Konferansê Kurdan ke Parlamentoya Ewropa (PE) de yeno viraştene de ame waştene ke weçîniteyê Kurdan ê ke hetê dewleta Tirkî ra ameyê tepiştene serbest vera dîyê. Avûkata heqanê merdiman Margaret Owene vat ke Tirkîye kewta binê îdareyêkê nijadperestî.

Konferansê Kurdan ke  reya 15ine Parlamentoya Ewropa (PE) de yeno viraştene de faktorê Kurdî û zextê Tirkîye yenê munaqeşekerdene

Konferanso ke her serre bi hawayêkê tradîsyonkîyî yeno viraştene Komîsyonê Hemwelatijê Tirkîye yê Yewîya Ewropa (EUTCC), Kongreya Kurdistanî ya Neteweyîye (KNK), Enstîtuya Kurdan a Brukselî û KURD-AKAD serkêşîya ci keno. Mîyanê paştîdayoxanê konferansî de Çepê Yewbîyayeyî yê Ewropa / Zergûnê Vakurî (GUE-NGL), Îtîfaqo Aver ê Zergûn û Sosyalîst-Demokratan (S&D) û şexsîyetê namdarî yê mîyanneteweyîyî zî estê.

Konferans bi qiseykerdişanê akerdişî dest pêkerd. Sereka Komîsyonê Hemwelatijê Tirkîye yê Yewîya Ewropa (EUTCC) Kariane Westrheima ke qiseykerdişo ewilên kerd derheqe muhtewaya konferansî de hayîdarîyî dayî. Westrheime vat Tirkîye hendî dewletêka nêbawer a. Aktorê ke seba huzûr û aşitî mucadele danê Kurd ê.”

Grûba Çepo Yewbîyaye yê Ewropa û Zergûnan ra hetkarê serekê Parlamentoya Ewropa Dimitrios Papadimoulisî qerarê MHME yê derheqê Selahattîn Demîrtaşî ard vîrî û vat: “Ganî Demîrtaş û weçîniteyî tavilî serbest bêrê veradayene.”

Konferans de endama grûba Îtîfaqê Zergûnî/Ewropaya Azade ya PE ya herêma Galîçya ya Îspanya Ana Mirandaye vat: “Ez zî Kurd a, Filistînij a, ez zî ê kesanê ke tay yenê temsîlkerdene yan zî qe nênê temsîlkerdene ra yew a.” Mirandaye ard ziwan ke ê do menga Kanûne de şirê Enqere. Dima ra zî şirê Amed û selahîyetdaranê HDPyîyan dir pêvînayîş virazê. Mirandaye vat ke çende şino Tirkîye Yewîya Ewropa ra kewena dûrî.

Meymana rûmetî ya Konferansî ke xo sey dostê Kurdan ê 20 serran da naskerdene avûkate Margaret Owen a Yewîya Şahanşahîye ra vat: “Tirkîye kewta binê îdarekarîyêk ke dişmenê cinîyan a û nijadperest a.”

Owene ard ziwan ke Tirkîye Sûrîye de sûcê şerî kena û Efrîn de “qirkerdişê etnîkî” kena. Owene ard vîrî ke hukmatê Îngilîzî zî xo dayo kîşta hêrişkerdoxan.

Dewamê qiseykerdişê xo de Owene nê vatî: “Seba teqîbê dewaya Demîrtaşî hewteyê vernîya ma ma do şirê Enqere. Tirkîye de heqê cinîyan nêmendê, ciwanî yenê tepiştene. Bi tepiştişê ciwananê Kurdan wazenê umîdî bişiknê.”

Peynî de Owene grevê veşanîye ya Leyla Guvene ard vîrî û wina qisey kerd: “Ez zî fikirêna ke tewrê grevê vêşanîye bibî. Ez veng dana hêzanê mîyanneteweyîyan ke paştî bidê Kurdan û Tirkîye NATO ra bierzê.”

Dimayê qiseykerdişanê akerdişî ra panelê Konferansî yo ewilên dest pêkerd.