Pîya bi şerê Ukrayna û Finlandiya û Swêd seba ke endamê NATOyî proses da dest pêkerdene la nê prosesî warê mîyanneteweyî semedê Tirkîya yewna masa akerd. Bazarîya na masa de verê operasyonê vera Sûrîye ame akerdene û semedê kurdan ê ke Filandiya û Swêd de yê zextî dest pêkerd. Bazarîya bi Finlandiya lez qedîyaye û la ya Sewêdî heta tîtikê NATOyî yê 11-12ê temmuze dewam kerde.

Verê tîtikî kombîyayîşê hîrê hetan ame kerdene. Erdoganî Sekreterê Pêroyî yê NATO Jens Stoltenberg û Serekê Swêdî Ulf Kristerssonî reyde pêvînayîş kerd. Erdoganî soz da ke ê do endamîya NATO ya Swêdî  meclîs de bîgêrê rojdemê xo û Kristerssonî vat ê do waştişanê dewleta tirke bîyarê ca.

Endamê Komîsyonê Karanê Teberî yê Partîya Çep a Keske Cengîz Çîçekî na rewşe erjnaye. Cengîz Çîçekî wina vat: ''Eşkera yo ke bi nê pêkerdişan îradeyê azadîye û destkewteyê şarê kurdî yenê hedefkerdene. Têna Tirkîya nê dewlete endamê NATO û welatanê Ewropa reyna vera kurdan qerar girewt. Endamîya NATOyî ya Swêdî ser o AKP û blokê rojawanî reyna vera kurdan têgêrenê. Pêkerdişê winayênî senî ke Pêkerdişê Lozanî newe bikerê. La êyê ke nê rolê bilanetî genê xo ser wa bizanê ke şarê kurdî şarê seserre verî nîyo. Semedê kurdan do tarîx reyna newe mebo û komplokarîya seserre bêro betalkerdene.

Ma sey Partîya Çep a Keske veng danê hêzanê rojawanî û dewleta tirke ke wa nê pêkerdişanê leyminan caverdê. Xora kurdî têkoşînê xo yê seba statu û azadîye domnenê û qederê xo teslîmê serdestan nêkenê. AKPyî polîtîkaya xo yê teberî bi temamî serê dişmenîya vera kurdan rayra beno. Ma sey partî qesawetanê asayîşî yê şarê Swêdî fam kenê la hukmatê Swêdî bi bazarîya yewna şarî karê xo rayra beno û bi nê tewirê xo erjano ke paweno binpay keno. Coka gerek nê bazarîyanê leyminan caverdo.''