Grûba Heme Partîyan ê Kurdîstan, Sûrîye û Tirkîya yê Parlamentoyê Îngîlîstanî  (APPG) raporê xo yê derheqê kurdanê Vakurê Kurdîstanî eşkera kerd. Rapor de hukmatê Îngîlîstanî ra ame waştene ke wa çarçewa qerarê mehkemeya Belçîka de qerarê pênasê ''terorîstî'' yê seba PKKyî newe ra bêro destgirewtene.

Raporde derheqê binpaykerdişê heqan ê vera kurdan û hetanê bînan de  zanayîş yeno dayene û nê binpaykerdişî yene ercnayene. Rapor de bale yene ser antene  ke Tirkîya de senî vera kurdan polîtîkayê zextî yenê rayraberdene û Erdoganî kurdî seranê peyênan de senî  hedef kerdî. Reyna hêrişê vera sîyasetmerdaranê kurdan û zextê zîndanan zî ca genê.

Rapor de yeno vatene: ''Hemşaredarê ke ameyî destbendkerdene heqê înan ameyî binpaykerdene.  Qefilnayîşê KCDyî de binpaykerdişê heqan o.  Vera HDPyî û warê ke pabesteyê ci yê bi hewayêkê sîstematîkî zext yeno kerdene. Hukmatê Îngîlîstanî ganî şiro dewleta tirke ser ke goreyê huqûqî têbigêro. Dezgehê mîyanneteweyî ganî binpaykerdişê heqanê Tirkîya û hêrişanê vera kurdan Konseya Ewropa de bikerê rojdem. Rêxitin û dezgehê kurdan yene qefilnayene û şuxulnayîşê ziwanê kurdkî û ciwîyayîşê kulturê kurdan yeno astengkerdene. Ganî qefilnayîşê nê dezgehanê ke semedê kultur û ziwanê kurdan gureyene, bêro rexnekerdene. Reyna heme hêrişê vera şarê sîvîlî bêro rexnekerdene.

Pêkerdişê Îstanbulî ame betalkerdene û vera cinîyan şîdet çend şino zêdîyeno. Cinîyê kurdan dilab binê tehlukeyî de yê. Ganî paştî bidîyo dezgehanê ke heqê cinîyan pawenê û polîtîkaya hêrişkare ya vera cinîyan bêro rexnekerdene. Vera çapemenîye hetê hukmatî ra zext yeno kerdene. Medyaya kurdan yena hedefgirewtene. Ganî çînkerdişê îfadeyê azadîye yê medayaya azade bêro rexnekerdene.''

Rapor de qerarê mehkemeya Belçîka yê PKK terorîst nîyo ame vîrardene û ame vatene ke ganî qerarê pênasê ''terorîstî''yê seba PKKyî newe ra bêro destgirewtene. Rapor de bale ameye ser antene ke Tirkîya de hetê ke semedê heqanê merdiman têkoşîn ke hetê îqtîdarî sey terorîstî yenê namekerdene û ame vatene ke PKKyî prosesê pêvînayîşanê haştîye de gamê mehkemî eştî û cehd keno ke waro sîyasîyî de xo îfade bikero. Komîsyonî hukmatê Îngîlîstanî ra waşt ke wa pîya bi PYD û YPGyî xebatan bikerê û semedê werêardişê PKK û hukmatê Tirkîya bigurîyo.''