Xeylî hetan ra sazîyê komelî yê sivîlî, sîyasetkarî, temsîlkarê sendîkayan, femînîstî û grûbê çepî bi slogana “Wa waştişê azadîye nêro qedexekerdene – Hemverê qanûnê polîsî, qedexeyê PKKyî û nijadperestîye de mucadeleyo hempar” 1ê Kanûne de Berlîn de yenê têhet. Hetê ke tewrê çalakîye benê rojnameyê Yenî Ozgur Polîtîka rê derheqê qedexeyê serê PKKyî û Dîwanê Edaletî de nê mesajî dayî: 

TAM WEXTÊ HEMVERÊ CI DE VEJÎYAYÎŞÎ YO

Temsîlkara Buroya Huqûqî ya AZADÎ Monîka Morrese vat: “Rayraşîyayîşê 1ê Kanûne do bibo rayraşîyayîşê hemverê hêrişanê dewlete yê serê heqanê hemwelatijan û polîtîkayanê ci yê cinsîyetperwer û qicfînayoxan. Ganî qedexeyo ke 25 serrî yo serê PKKyî de yo bêro wedartene û PKK lîsteya terorî ya Yewîya Ewropa ra bêro vetene. Îtîfaqo ke do 1ê Kanûne de bêro viraştene tam zî seba nê yo.”

Huqûqnas Norman Paechî zî vat: “Qerarê Dîwanê Edaletî qerarêko ereykewte yo. Dewletanê Ewropa mucadeleyê legalî yê Kurdan ê seba xopawitiş, xoîdarekerdiş û xoserî nêdî. Mucadeleyê înan ê hemverê hêriş û zextanê leşker û polîsê Tirkî nêdî. Eke do sûcdarîyêka terorîzmî bêro kerdene ganî seba hêzanê asayîşî yê Tirkî bêro kerdene, seba PKKyî nê!”

ZEXTO SÎYASÎ YO HÎNA PÎL ŞERT O

Berpirsîyara IPPNWyî ya Tirkîye Dr. Gisela Pentekere nê vatî: “Ez bi xo bena şahid ke dormeyê mi de zextê hemverê Kurdanê aktîfan de çende şinê benê zêde. Kurdê ke Almanya de yê seba pêrodayîşê ma zî bi ser bikewo mucadele danê. Na yewe ra ez do zî 1ê Kanûne de Berlîn de bibî.”

Endamê Îdareyê Federalî yê Sendîkaya Ver.di Joachim Legatisî wina vat: “Ez sey rojnameger û sendîkakarêk qedexeyê serê PKKyî sey hêrişêk hemverê azadîya îfadeyî vînena. Ganî no qedexe wedarîyo û hemverê zextanê hukmatê Tirkî yê serê muxalifan de veng bêro berzkerdene.”

Eşkerayîye de endama Îdareyê Federalî yê Rote Hilfeyî Anja Sommerfelde, tarîxnas û nûştox Nick Brauns û vervatoxa Partîya Cinîyanê Femînîstan a Federale Margot Mullere zî paştîdayîşê xo yê seba wedartişê qedexeyê serê PKKyî ard ziwan.